Shillong, Naiwieng 10
U Superintendent of Police (SP) ka East Khasi Hills, u Bah Vivek Syiem, ha ka Lah Sngi U Blei, u la ïathuh ba ki pulit ki dang pynkhreh ïa ka jingmudui ne ka ‘Charge-sheet’ kaba ar halor ka jingshah pynïap jong u nongkhaïi na Indore, u Raja Raghuvanshi, bad la khmih lynti ba yn sa aiti ïa kane ha ka taïew kaba lai jong u bnai Naiwieng, katba dang ap ïa ka kaiphod ‘Forensic’ na ka CFSL, Hyderabad.
“Ka jingmudui ka la ïaid shaid-shaid. Shisien ba ngi la ïoh ïa ka kaiphod ‘Forensic’ na ka CFSL, Hyderabad, ngin sa lah ban aiti ïa ka jingmudui kaba ar jong ngi. Ka jingbuh por jong ngi kan long la kumno-kumno ha ka taïew banyngkong jong u bnai Nohprah, ngi la dei ban aiti, hynrei ha ka taïew kaba lai jong u bnai Naiwieng, ngi dei ban aiti noh ïa ka jingmudui jong ngi,” ong u Bah Vivek haba kren sha ki nongthoh khubor. “Ngi la pynwandur ïa ka mukotduma ha ka rukom kaba skhem bha bad ka SIT ka la ai ïa ka jingmudui kaba khlaiñ bha”, u la ong.
U la ong ruh ba ka rai ai jamin ka shong ha ka ïingbishar da kaba bynrap ba ki pulit ki la lum ïa ki nongrim ne ki daw kiba biang ban kyrshan ïa ka jingkynnoh jong ki.
Kitei kiba la shah kynnoh, kynthup ïa ka kurim jong u Raghuvanshi, ka Sonam Raghuvanshi lem bad saw ngut kiwei pat, ki don mynta ha patok. Ki pulit ki dang ap ïa ka kaiphod ‘Forensic’ ban pyndep ïa ka jingmudui jong ki.
