Shillong, Naiwieng 10
U President ka Meghalaya Pradesh Congress Committee (MPCC) u Bah Vincent H Pala u la kynthoh da kaba ong ba ka jingthaw ïa ka ‘One North East’ ka dei tang ka jingthmu ban pynthame ïa u paidbah namar ka jingbym ler shuh ha ka rukom synshar ka Sorkar.
Haba kren bad ki lad pathai khubor, u Bah Vincent H Pala u la ther tyngeh ïa u National President ka National People’s Party (NPP) u Conrad K Sangma uba dei ruh u Myntri Rangbah ka Jylla haba ïadei bad ka jingthaw ïa ka ‘One North East Alliance’ ka rynsan ban don ka jingïatylli bad ka sur kaba kham jan ha ka saiñ hima ka Ri India.
Une u nongïalam ka Congress hapoh Megha-laya haba pynpaw ïa ka jingkmen ïa ka jingpyrshang ka jong ki ban pynïatylli ïa ka thaiñ shatei lam-mihngi, u la ong ba kane kam dei shuh ka jingpyrshang kaba thymmai hynrei ka dei kaba la rim bad kaba dei ban don ïa ka thong kaba shisha ym tang na ka bynta ka jingïohnong saiñ hima.
Nalor kata, u la kam ba kane ka rynsan kaba don bynta lang da u nongseng ka Tipra Motha, u Pradyot Bikram Manikya Debbarma, u Mmhonlumo Kikon, u nongseng ka Assam People’s Party, u Daniel Langthasa, ka dei tang kum ka lad ban pynthame ïa ki paidbah na ka jingbymler ka rukom synshar ka Sorkar.
U la ong ba ki seng kiba don ha kane ka kynhun, ki dei hi ki seng kiba ïatreilang hapoh ka Sorkar NDA bad don jingïadei bad ka BJP, kata kum ka Tipra Motha kaba ïatreilang bad ka BJP ha Tripura, ka NPP kaba ïatreilang bad ka BJP bad nalor kine, ki don ruh kiwei ki nongïalam seng saiñpyrthei kiba la dei lypa ki nongïalam barim ka BJP.
“Hooid, ka jingthmu ka long kaba bha eh ban wanrah ïa kata ka jingïatylli kawei. Hynrei ha ka jingsngew jong nga shimet, kin nym lah satia ban thaw pyrthei ne ban poi shaei-shaei ruh. Kan long shisha kaba eh bad hato ki paidbah kin dang ai ka jingshaniah ïa ki,” la ong u Bah Pala bad bynrap ba kane baroh ka dei ruh tang ban pynsngewbha ne pynbyrngia ïa ki jingmut jingpyrkhat jong u paidbah, namar ha ka politik hapoh ka Ri India, yn nym lah satia ban long tang jong ki riewlum hynrei hap ban long salonsar lang na bynta baroh.
