Shillong, Naiwieng 10
Ka HYDC, East Jaiñtia Hills District hapoh ka jingïalam u President, Bah Mihsalan Thoo ryngkat bad u Secretary, Bah Hepwing Chyrmang ha ryngkat ki dkhot ki la leit ban ai ka jingkyrshan ïa ka jingïakhih jong ka MCTODA ha Mawryngkneng.
Kane ka jingleit kyrshan jong ka HYDC, ka dei kum shi bynta ban kyntiew ïa ka kamai kajih ha kaba ïa dei bad ki kam kit kam bah jong ki nongñiah bad trai trok.
Haba kren sha ki lad pathai khubor u Bah Mihsalan Thoo u la ong ba ka Sorkar Meghalaya ka la dei ban pyrkhat kham bha na ka bynta ka bha ka miat jong ki paradoh parasnam.
U la kyntu ruh ïa ka Sorkar ba kam dei ban ïa shah than ïa ki High Level kiba dei ki JAC jong ka JHTOA.
“Kane JAC ka dei ka wei ka daw kaba pynlong ïa ka jingduh nong jong ki rit ki ria ha ka kam kamai na ki trok. Ka jingdie jong ki ïa ki slip ban ïoh ïa ka dor ba la buh da ka Sorkar sha ki katto-katne, ka paw shai ba kam don ka jingkamai da ka hok hynrei bun tang ki kam thok kam shukor,” u la ong.
U la ong ruh ba kine ki High Level ki dei maki kiba ñion beiñ ïa ki rit ki ria, ka jingphah jong ki ban pahara ïa ki kali ban leh jubor bad leh pyrshah ïa ka jingdawa ka MCTODA, kaba dei kawei kaba la wanrah ïa ka jing kulmar ha kane ka jingïakhih kaba jai-jai.
U Bah Mihsalan u la ai jingmut, ba ka Cement kompani ka dei beit ban ai ïa ka dor ba la dawa da ka MCTODA bad ba ka Sorkar ka dei ban pyntrei kam ïa ki dor ba la la buh katkum ka jingpyntip ba la pynmih da ka tnad Transport.
