Shillong, Naiwieng 10
U Bah Vivek Syiem, Superintendent of Police ka East Khasi Hills, u la ong ba ka jingtohkit ïa ka jingshah pynïap i heprit Insaphira Lyngdoh Mawnai, ba dang 4 snem ka rta na ka shong Nongrah Nonglum Brei, ka long kaba kham shitom ban lap ksai, namar ba ïa kane ka kam la leh da u khynnah ba dang 13 snem ka rta.
U SP u la ïathuh ba ki pulit mynta ki dang ngam jylliew shuh-shuh halor ka jingshah pynïap i heprit Insaphira.
“Namar ba, uba donkti ban leh ïa kane ka kam u dei uba dang khynnah, kumta ïa ka jingtohkit la leh katkum ka jingai jingbit na ka Child Welfare Committee bad la hap ruh ban tohkit hakhmat ki ‘Councellor’,” la ong u SP.
U la ong ruh ba na ka liang ki pulit ki la pynlong ïa ka jingtohkit kaba bniah halor kane, ba ïoh lehse une u khynnah u don ka jingthmu ban leh be-i-jot ïa i heprit Insaphira.
“Ka kynhun tohkit SIT ka kham ngam jylliew bha halor kane ka jingjia ka long namar ba kim kwah ban shu pynkut noh tang ha ka jingshah pynngam jyllop, hynrei ki kwah ruh ban da tohkit ba ïoh lehse u ne u khynnah u don ka jingthmu ban leh kam sniew, kum ban leh be-i-jot,” la bynrap u SP.
Shuh-shuh u ong “Wat lada kam shym la don kino-kino ki dak ki shin ha ka met jong i heprit Insaphira, ban ong ba i ne i heprit in shah leh be-i-jot, hynrei ka jingtohkit kan dang ïaid”.
U SP u la ong ba ka kynhun tohkit ka kham shem jingeh ban ïaid shakhmat ïa ka jingtohkit jong ki ïa une u khynnah, namar ba u dei uba dang don ha ka rta ba 13 snem bad mynta la rah ïa u sha ka jaka ba kyrpang.
Nalor kata, u la ong ba ka jingtohkit ka kham ïaid suki jai bad ka jia long ba namar ba ïa u ne u khynnah ïa uba ki la bat mynta, kim lah da lei-lei ban tohkit ha kata ka rukom kumba long lem kum kiwei pat ki nongleh kam sniew.
