Shillong, Naiwieng 10
Ka kynrum kynram ka la mih ha North Eastern Hills University (NEHU) namar ka jingthmu u Prof. Prabha Shankar Shukla, Vice Chancellor ka Skulbah, ban khot pynlong ‘EC Meeting’ ha Nongbah Delhi, kaba la pynlong ïa ki samla pule ban mih shakhmat ban pynpaw ka jingpyrshah ïa ka jingthmu u VC ka NEHU.
U Prof. S. Umdor, Pro-Vice Chancellor ka NEHU u la mih shakhmat ban ai jingpynshai halor kane, ha kaba u la ong ba naduh ba u shimti ïa ka kam kum u Pro-VC ka Skulbah, u Prof. Shukla u la bthah bunsien, ba u dei ban khot pynlong ïa ka ‘EC Meeting’, hynrei na ka liang jong u, u la kyntait, bad namar ka jingïoh hukum na ka tnad pule puthi ka Sorkar Pdeng, ka la pynlong ïa u ruh ba u hap ban khot ïa ka jingïalang.
Haba kren sha ki nongthoh khubor u Prof. Umdor u la ong, ba ka tnad ka dei kaba mang ïa ki jingïarap pisa hapoh ka Skulbah bad ong ba ki samla pule ki lah ban pyrshah ïa u Prof. Shukla hynrei ym lah pat ban pyrshah ïa ka tnad ba dei peit.
“U Prof. Shukla u la bthah ban pynlong ïa ka ‘EC Meeting’ naduh u bnai Nailur, hynrei nga la kyntait ban khot ïa ka jingïalang namar ka jinglong jingman bad ka jingpyrshah ki samla pule hapoh ka Skulbah NEHU” la ong u Prof. Umdor.
Shuh-shuh u la ong, “Ha ka 24 tarik u Risaw ka tnad pule puthi ka Sorkar Pdeng, ka la bthah ïa nga lyngba ka ‘phone call’ ban pynlong noh ïa ka ‘EC Meeting’ bad ngam lah ban kyrngah ïa ka jingbthah jong ka Ministry.”
U Prof. Umdor u la ïathuh ba ka Skulbah ka ju ïoh ïa ka jingïarap pisa na ka tnad ha kaba ha u snem 2024 ka ïoh haduh T. 53 klur, katba ha u snem 2025 ka ïoh pisa tang T. 31 klur. Namar kata ka Skulbah ka ïakynduh ïa ka jingduna pisa ha ka ban pynïaid ïa ki kam, namar ka jinglut ka kot haduh T. 40 klur ha ka shisnem.
U Prof. Umdor u la kam ba ha ki 5 bnai ha ka jinglong jong u kum u Pro-VC u la ïaleh katba lah ban pynïaid ïa ka jingïaid beit ïaid ryntih ka Skulbah, haba ïadei bad ki eksam bad ka ‘Academic Council’, ha kajuh ka por la lah ruh ban plie ïa ka ‘Hostel’ na ka bynta ki kynthei kaba don haduh 100 kamra bad shibun kiei-kiei.
Haba jubab ïa ki jingkylli, u Prof. Umdor u la kubur ïa ka jingong ki khynnah ba ka kyndon ka ong, ba ka ‘EC Meeting’ ka dei ban long hapoh ka Skulbah, hynrei u la ong ba ka don pat ka kyndon kaba ong, ba lada don kano-kano ka daw, ka tnad ba dei peit kan ai jingbit ban pynlong ‘EC Meeting’ bad ka tnad ka la dep bthah ban pynlong jingïalang lyngba ka ‘phone call’.
