Shillong, Naiwieng 10
U Superintendent of Police ka East Khasi Hills, u Bah Vivek Syiem u la pyntip ba katkum kaiphod ‘Post Mortem’ halor ka jingkhlad u Kyrshanbor Kharmudai, la lap ba ka jingkhlad jong u ka dei ba u shah set ban ring mynsiem (Suffocation).
U la pyntip ruh ba ki pulit ki dang ap ruh sa ïa kaiphod na ka Forensic, khnang ba lah ban tip bad lap ksai shuh shuh.
“Ka jingtohkit halor ka jingshah pynïap u heprit Kyrshanbor Kharmudai, ba dang 7 snem ka rta na ka shnong Nongrah Lummarboh ka long kaba jwat bad kaba kyllaiñ bha, hynrei ki pulit ki shan khmat ïa kiba bun ngut ki briew kiba lah ban donkti ha kane ka kam,” la ong u Bah Vivek.
U la ong ba ka kynhun tohkit kaba kyrpang ne ka Special Investigation Team (SIT) kan dang iai bteng ïa ka jingtohkit ban lap dien shuh-shuh halor ka jingkhlad u heprit kyrshanbor.
U Bah Vivek u la ong ïa mynta um pat kwah ban ïathuh ei-ei bad ban batai lut, hynrei ki pulit ki la shan khmat ruh ïa kumba katto-kattne ngut ki briew kiba la suba ba ki donkti ban shim ïa ka jingim u Kyrshanbor.
“Ka kynhun SIT kan dang pynlong ïa ka jingtohkit ban lap, ba mano uba donkti shisha ban shim ïa ka jingim u heprit Kyrshanbor Kharmudai,” la bynrap u Bah Vivek Syiem.
