Jowai, Naiwieng 12
Ha kawei ka jingjia kaba sngewsih kaba la jia ha ka shnong Salaroh, Jowai, ki ar ngut ki shi kurim kila duh ei noh ïa la ka jingim na ka daw ka jingïap ngam jyllop.
Kane ka jingjia ka la jia ha ka por kumba shi baje mynsngi jong ka 12 tarik mynta u bnai ha kawei na ki tyllong um kaba dang shu tih thymmai kaba jylliew kumba 10 phut kaba don habar ïing sah jong ki.
Katkum ka jingïathuh jong ki pulit, u Waheh Shnong Moosalyngkat u la pyntip ba ka Kong Mimon Pala ba la 59 snem ka rta kumno re kumno da ka jingbakla kala hap shapoh katei ka thliew um.
Halor kane, na ka liang jong u kurim jong ka, u Bah Deimonlang Sutnga ba 55 snem ka rta marsien ïohi ïa kane ka jingjia, mar-mar u la kynthih ban pyllait im ïa la ka lok, hynrei sngewsih ba ma u ruh, u la ngam jyllop lang ha katei ka thliew um.
La ïathuh ba halor kane ka jingjia la pyntip noh sha ki pulit ka tnat pynlip ding ban sei ïa kitei ki met ïap.
Ki pulit ki la pynlong ïa ka jingtohkit ha kane hi ka jaka bad pyndep ïa baroh ki jingdonkam katkum ka aiñ bad ym shym la lap ïa kino-kino ki dak ba suba sniew bad la pynthikna ba ka jingïap ka dei na ka jingïap ngam jyllop.
