Shillong, Naiwieng 13
Ka Chitralayam Studios kaba na South India ka la wan ringdur haduh 90 percent ïa ka phlim thymmai kaba ai kyrteng ‘Baa Baa Black Sheep’ kaba la kren ha ka ktien Telegu bad 10 percent yn ringdur ha Hyderabad.
Ha ka 13 tarik Naiwieng, 2025, ki paidbah kiba ïaid ba ïeng ha Khyndailad ki la ker tawiar ban peitkai haba kawei ka phlim Telegu na Hyderabad ka la wan ringdur hapdeng surok ha Khyndailad, Shillong kaba la ïaid ha kane ka sngi.
Kane ka phlim Telegu na South India ka dei kaba la ai kyrteng ‘Baa Baa Black Sheep’ kaba la pynmih da ka Chitralayam Studios kaba la long trai da u Venu Donepudi bad ba la direct ne shna da u Guni.
Ka khana jong kane ka phlim ka dei shaphang ki kam pyntriem haba yn ringdur haduh 90 percent ha Meghalaya bad 10 percent ha Hyderabad. Ki jaka ba kane ka phlim kan leit ringdur ki long kum ha Sohra, Dawki bad Shillong.
Ka jaka ba ringdur ka dei hakhmat jong ka Bijou Cinema Shillong ïa kaba la ïohi ba ki camera, ki jingpynshai ki la dap lut hapdeng surok ban phah ak ïa u tyngshop bad ka puron ban shong ha ka thuk thuk katba ki samla Khasi kiba ïashimbynta ha kane ka phlim ki don kiba tem ïa ka bom bad ki la kynhoi.
Watla ki bor pynïaid jong kane ka phlim kim shah ban ringdur hynrei ym shym la lah ban tehlakam namar baroh ki briew ki la bat la ki phone bad ki la ringdur beit namar ka dei ha jaka paidbah.
Haba ïoh ban ïakren bad u trai jong ka phlim u Venu Donepudi u la ai khublei ïa ka Sorkar Meghalaya hapoh ka jingïalam u Conrad K Sangma kum u Myntri Rangbah ka Jylla bad ïa u Vijay Kumar u Commissioner and Secretary ka tnat Tourism kiba la shah sngewbha ban wan ringdur sha Meghalaya.
U la ong ba ka jingwanring dur ïa kane ka phlim ha Meghalaya ka long ban kyntiew ïa ka kam jngohkai pyrthei ïa ka jingitynnad ka mariang bad la pynkhreh ban pyllait ha baroh ki cinema kylleng ka pyrthei ka ban long lashem snem.
Shuh shuh u la pyntip ba ki nongïashim bynta na Telegu kin long 100 ngut bad la jied palat ar hajar ngut ki samla na Meghalaya ban ïashimbynta.
U la ïathuh ba u la pynkhreh ban pan jingïarap pisa na ka Sorkar Meghalaya lyngba ka Meghalaya Film Tourism Policy kaba kot haduh shi klur tyngka ka subsidy.
U don jingkyrmen ba kane ka phlim kan khring ïa ki paidbah ha ri India bad kylleng ka pyrthei khnang ban khring ruh ïa kiwei ki nongshna phlim ban wan sha Meghalaya namar ka long ka jaka kaba itynnad.
