Nongpoh, Naiwieng 13
U Myntri ka tnat Community and Rural Development (C&RD) ka Sorkar Jylla Bah Sosthenes Sohtun ha ka sngi Palei u la plie paidbah ïa ka Eri Silk Spinning Centre jong ka shnong Umkynsier kaba hap hapoh ka Jirang C&RD Block, Ri Bhoi District.
Ha kane ka sngi plie paidbah ïa katei ka centre kaba don ryngkat bad ki mashin thir ksai Ryndia la wan ban ïadon ryngkat ruh da u Deputy Commissioner ka Ri Bhoi, u Abhilash Baranwal, u Executive Director ka Indian Oil Corporation Limited (IOCL), u Project Director ka DRDA Ri Bhoi, u Raja Brahma, u BDO ka Jirang C&RD Block, u Dr. Hajong nalor kiwei-kiwei.
Kum ban shu ïathuh hangne, ki don haduh kumba 30 tylli kiba kum kine ki jait Centre ha kylleng ka Ribhoi District hapoh ka jingkhmih jong ki C&RD Block bapher bapher kiba la pynïoh lyngba ka jingshimkhia jong ki bor pynïaid District ka Ri Bhoi ha ryngkat ka jingïatreilang bad ka Meghalaya State Rural Livelihood Society (MSRLS) bad kyrshan pisa da ka IOCL lyngba ka Corporate Social Responsibility (CSR) ban kyntiew ïa ka ïoh ka kot jong ki longkmie nongkyndong kiba im ja bad pynbit pynbiang ïa ka ïing ka sem lyngba ka kam thir ksai bad thaiñ jaiñ Ryndia.
U Bah Sosthenes haba ai jingkren ha kane ka sngi, u la ai ka jingïaroh sha ki bor pynïaid district ka Ri Bhoi, ka MSRLS, ka IOCL lem bad kiwei-kiwei kiba la ïadon bynta lang ban pynurlong ïa kane ka kam, ka ban long da shisha ka jingmyntoi kaba khraw ïa ki nongthir ksai ym tang ha ka shnong Umkynsier, hynrei ha baroh kawei hi ka Ri Bhoi District.
U Myntri u la pynpaw ruh kiba bun na ki jaka thir ksai ryndia ha Ri Bhoi ki ju pyndonkam lyngba ki tiar ki tar kiba long katkum ka juk ki mynbarim, kaba shimpor bad pynduna ïa ka jinglah ka jong ki ban pynmih bun, hynrei lyngba ka jingïoh ïa kine ki centre ha ryngkat ki mashin thir ksai kiba thymmai, kan ïarap shibun ban pynsted, pynsuk bad ai jingmyntoi ïa ki.
Lyngba ka jingplie paidbah ïa kane ka Centre ha Umkynsier, la pynbna paidbah ruh ha kajuh ka por ba baroh ki 30 tylli ki Eri Silk Spinning Centre kiba don ha kylleng jong ka district, la plie paidbah syndon khnang ba kin long ka jingmyntoi kaba khraw ïa ki paidbah nongthir ksai, khamtam ki longkmie kiba ju don bynta ha kane ka kam.
