Shillong, Naiwieng 13
Ka Hynñiewtrep Border Dispute Redressal Forum (HBDRF) ha ka sngi Palei ka la dawa ïa u Myntri Rangbah ka Meghalaya, u Conrad K. Sangma, ban ai jingtip ïa ka jinglong jingman ka Block-I bad Block-II, da kaba pynpaw ïa ka jingsngewbitar ïa ka jingsngap mynthi ka Sorkar Jylla haba ïadei ka jingkajia khappud.
Ha ka shithi ba la phah sha u Conrad K. Sangma, ka HBDRF ka la kyrpad ïa ka Sorkar Jylla ban ai jingpyntip hapoh ar taïew haba ïadei ka jinglong jingman ha Block-I bad Block-II.
U Bah Chandame Sungoh, Chairman ka HBDRF haba kren sha ki nongthoh khubor, u la kdew ba ka Furom ka la phah jingthoh bunsien haba ïadei bad kane ka mat sha u Myntri Rangbah, hynrei kim ïoh satia ïa kano-kano ka jubab ba thikna lane ki sienjam kiba ka Sorkar ka la leh.
Ka Forum ka la pynpaw ba haduh mynta ka la dep ban phah saw tylli ki jingthoh ba kongsan na ka bynta ka jingpynkhreh ka Sorkar, ïa kaba ka la kdew ïa ka jingdonkam kyrkieh ban pynbeit ïa u pud u sam.
U Bah Chandame u la kdew ruh ba ha ka 1 tarik Rymphang 2024 , ka Furom ka la phah jingthoh ha kaba ïadei bad ka Block-I. Ha ka 25 tarik Jylliew 2025 haba ïadei ka Jingpynpaw pyrshah ïa ka Socheng Amreng Border Development Committee (SABDC) halor ka jingdawa ban register khyndew bad ban pynmih biang ïa ka khyrdop lum khajna (Entry Tax Gate) ha ka shnong Khanduli.
Ka jingïalang ba la long markhmat bad u Myntri Rangbah bad ki Ophisar Sorkar ha ka 25 tarik Jymmang 2025 bad ha ka shithi ba la kyrpad ban ai jingithuh ïa ki shnong ka Elaka Labang Nongphyllut kumba la pynbna da ka Jaiñtia Hills Autonomous District Council (JHADC) ha ka 13 tarik Nailar 2025.
Ka HBDRF ka la pynpaw ïa ka jingsngewdiaw halor ka jingsngap mynthi ka Sorkar ïa kine ki mat kiba kongsan, da kaba kdew ïa ka jingktah ba jur ha ka imlang-sahlang, ka saiñ-pyrthei bad jingroi-jingpar ki paidbah ha ki shnong khappud.
Kane ka shithi ka long kum ka jingdawa ba tyngeh ka Furom sha ka Sorkar Meghalaya ba kan ai jingtip hapoh ar taïew ïa ka jinglong-jingman bad halor ki sienjam ba ka Sorkar ka la leh ban weng ïa ki jingeh ha ki thaiñ khappud.
