Shillong, Naiwieng 13
U Bah Prestone Tynsong, u Symbud Myntri Rangbah ka Jylla uba dei ruh u President ka NPP Meghalaya u la ong ba ha u snem 2023, la rah suk da kiwei ïa ka nam jop ha Nongkrem Konstitwensi ba ïaleh pyrshah ka NPP bad u Bah Lambor.
“Mynta ha u snem 2028 ba ngi la ïa long kawei, u Bah Lambor Malngiang un sa rah ïa ka nam jop,” u la ong.
Ïa kane u Bah Prestone u la kren ha ka jingïalang pdiang sngewbha ïa u Bah Lambor Malngiang ryngkat ki spah ngut ki nongkyrshan kiba la wan ban pynïasoh sha ka sem jong ka NPP.
Khlem da jer kyrteng, u Bah Prestone Tynsong u la ong ba ka Nongkrem Konstitwensi mynta ka la ïoh da u wei pat u MLA bad ki paidbah jong ka Nongkrem ki kham tip kham bha, la u bha ne u sniew.
U Bah Prestone u la kop ruh ba ka NPP ha u snem 2028 kan sa ïoh biang ban synshar ïa ka Jylla baroh kawei.
“Mynta ngi la don lang ha kawei ka seng, ngi dei ban kynmaw ba kane ka longïing longsem ka dei kaba heh. Naduh na Garo, Khasi-Jaiñtia ngi ïa long shi ïing shi sem,” la ong u Bah Prestone. Kumta u la ong ba ngin kynmaw, da kaba ai nuksa ruh ruh “Haba don ka ïing ka sem kaba heh, haba pang u wei u hynmen, don 10 ngut ki para ka ïing ka sem ka shngaiñ bad sngew shongshit”.
Haba phi la wan ban pynïasoh lang sha ka NPP, ngin ïa kit khlieh lang ïa ki jingeh kiba bun syrtap kiba ngi ïa kynduh, la bynrap u Bah Prestone.
Nalor kata, u la kyntu ruh ïa baroh ki samla, ki longkmie, ki longkpa kiba la pynïasoh lang sha ka NPP bad u Bah Lambor Malngiang, ban ïa trei shitom nangne shakhmat bad ban pynphriang ïa ka khubor kaba bha.
