Shillong, Naiwieng 13
U Bah Chandame Sungoh, Chairman ka Hynñiewtrep Border Dispute Redressal Forum (HBDRF) u la ong ba, ki Karbi ki mut ban beh shnong ïa ki jaitbynriew Khasi-Pnar ba shong ha Block-I & II lyngba ka jingleh donbor bad ki jingpynshitom beiñ, ha kaba ki jaitbynriew Khasi-Pnar ki la hap ban phet shnong haduh laisien laiwat ha ki snem ba la dep, namar ki kam pyntriem ka seng kaikhlaw karbi.
Ïa kane la ïathuh da u Bah Chandame Sungoh ha ka jingïakren sha ki nongthoh khubor ha ka sngi Palei.
U Bah Chandame u la ong ba, ki Karbi ha ki snem kiba ladep ki leh donbor bad ki pynshitom beiñ ïa ki Khasi-Pnar ha ki thaiñ Block-I & II da ka jingthmu ban beh noh ïa ki na katei ka ka jaka, hynrei haba kim lah ban beh mynta ki la pyrshang ban pyndonkam da ki buit, kata da kaba khroh pynbeij ïa ki Khasi-Pnar da kaba ai ïa skhim bad ki lad jingïarap ba bunjait na ka Sorkar Assam bad ki bor District Council ka Karbi Anglong.
Haba ïadei bad kane u Bah Chandame u la kyntu ïa ki Khasi-Pnar kiba shong ba sah ha Block-I & II ba kim dei ban ngop ha kum kitei ki jingpynbiej namar kane ka dei tang ka buit jong ki ban pynbiej pynngop ïa ki Khasi-Pnar ba kin neh noh hapoh Assam.
“Kane ka dei ka por jong ka jingïaleh bad ngi ki nongïalam ruh ngi ïaleh katba lah ban pynbor ïa ka Sorkar Jylla bad ka Sorkar Assam na ka bynta ban pyndep kloi noh ïa ka jingpynbeit haba ïadei u pud u sam.” la ong u Bah Chandame.
Shuh-shuh u la kyntu ïa ki nongshong shnong ka thaiñ Block-I & II ba kim dei ban ngop ha kiba kum kine ki jingpynbiej jong ka Sorkar Assam, namar kane ka dei tang ka buit pynbiej jong ki bad kim dei ban tieng, hynrei ban long kiba shlur, kiba skhem ka jingmut jingpyrkhat bad ban don ka jingïaishah.
