Shillong, Naiwieng 13
U Myntri Rangbah ka Jylla Conrad K Sangma ha ka sngi Palei, u la kyntu ïa ki paidbah ba kin pyndonkam da ka Right to Information (RTI) ban shem la ki skhim MLA bad MP ki dei kiba la pyntreikam hok ha ki konstitwensi ba bat da ki seng saiñpyrthei ba don ha ka Liang Pyrshah kiba kam ba duna ki kam pynroi ha ki jaka jong ki.
“Don ki por haba nga khmih ïa ki konstitwensi bapher bapher, khamtam ha ki jaka jong ki Liang Pyrshah, ka roi ka par ka duna bha. Nga artatien la ki MLA ki pyntreikam hok ne em ïa ki skhim MLA ha ki konstitwensi jong ki,” ong u Conrad haba kren ha ka jingïalang pdiang ïa u MLA barim ka Nongkrem Bah Lambor Malngiang, uba la wan pynïasoh sha ka NPP ha ka sngi Palei.
U Conrad u la kyntu ïa ki nongshong shnong jong ki konstitwensi jong ki Liang Pyrshah ba kin pan jingtip da ka RTI.
“Nga kyrmen ba ki paidbah jong kito ki jaka kin mih shakhmat bad pan RTI bad ban wad kumno ki MLA ki pyndonkam hok ne em ïa ki MLA skhim, kumno u MP u pyndonkam hok ne em ïa ki skhim. Sngewbha ïa pan RTI bad wad ïa ka jingshisha,” u la kyntu.
U la ban jur ïa ka jingbym don ka jingïatreilang na ki katto katne ki MLA ka Liang Pyrshah haba pynpaw ba ki don katto katne ki seng saiñpyrthei kiba kyntait wat ban ïakynduh ne kren ïa u Myntri Rangbah, kaba ktah jur ïa ka jingpyrshang ban theh ïa ki kam pynroi.
“Ha ka synshar khadar, ki don beit ki Liang Pyrshah bad ki don beit ki Liang Synshar, hynrei na ka bynta ka roi ka par jong ki briew jong ngi, wat ki MLA ka Liang Pyrshah ki donkam ïa ka jingïarap jong ka Sorkar, kane ka dei ka rukom treikam ka riti synshar paidbah, kane ka dei ka rukom treikam ka synshar khadar,” bynrap u Conrad.
U la kdew ruh ba ki Nongmihkhmat paidbah kiba kheiñ sting ïa la kam kamram, ki dei ban kitkhlieh ïa la ki jong ki nongthep vote bad katba ka Sorkar ka dang pyrshang ban pynïaid shakhmat ïa ka roi ka par, ka jingbym don ka jingïatreilang kala pyndkoh ïa kiei-kiei baroh.
