Shillong, Naiwieng 13
Ka Meghalaya Workers and Helpers Union (MAWHU) Meghalaya Sengkmie ryngkat bad ki nongïalam jong ki sector na man ki project jong ka East bad West Jaiñtia Hills District ki la leit ban ïakynduh ïa ka District Program Officer, ICDS Cells ban pynshai halor ka jingmih khubor ha ka 11 tarik Naiwieng 2025 jong ka All Jaiñtia Anganwadi and Helper Worker Union namar ka MAWHU kam don jingtip ne don bynta eiei ruh em bad kane ka jingpynmih khubor ka jong ki.
Ka Union lyngba ka kyrwoh ba la phah ka la pyntip ba ha Saipung, Khliehriat, Laskein, Thadlaskein bad Amlarem ki don la ki jong ki sector leader kaba mut ki President bad Secretary kiba buh beit buh ryntih ïa ka jingdonkam baroh ki nongtrei.
Ka Union ka la pyntip ba ka jingïalang hapdeng ki ophis ka tnat Social Welfare ha ka 22 tarik Risaw 2025 ha Conference room, jong ka Directorate Social Welfare ha jingïadonlang ki nongïalam ka Union kiba kynthup na Khasi, Jaiñtia bad Garo ki la ïakren shibun ha ki kam ba dang sahteng kaba ki ophis ki la kular ba kin pyndep noh hapoh u snem 2025.
Kum ban shu pynkynmaw ka All Jaiñtia Anganwadi & Helper Workers Union kaba kynthup ïa ka East bad West Jaiñtia Hills District mynha ka 10 tarik u Naiwieng kala pynlong ïa ka jingïakynduhlang ha Hall jong ka Chilliang Raij, Jowai.
Ha kane ka sngi, ki nongtrei Anganwadi & Helper kila shim ïa ka rai ban kyrpad ïa ka Director ka Social Welfare Department jong ka Sorkar Jylla ban siew noh ïa ka pisa T.3000/- shibnai kum ka (honorarium) ïa kaba ka Sorkar kam pat siew naduh u bnai Jymmang 2025 haduh u bnai Risaw 2025.
Halor kane la ai por ïa ka Sorkar Jylla ban siew lut ïa katei ka pisa hashwa ban kut jong u bnai Naiwieng, 2025.
