Shillong, Naiwieng 14
U President ka Bharatiya Janata Party, Meghalaya State Unit u Rikman G Momin, u la kam ba ka Party ka la pynkhreh bha ha kaba ïadei bad ki ilekshon ban sa wan bad ha u snem 2028 kan sa don ka jingkylla ba khraw ha ka Jylla Meghalaya.
U Momin haba kren sha ki nongthoh khubor ha ka sngi Thohdieng u la pynpaw ïa ka jingsngewkmen ïa ka jingjop bun ngut ki kyrtong ka BJP ha ka ilekshon MLA ha ka Jylla Bihar, bad ong ba ka party ha ka Jylla Meghalaya ruh kan trei shitom ha ki snem ban sa wan, u la ong ba ka party ka la sdang ban kiew bha ha ka Jylla bad kam ba ha u snem 2028 ka BJP ha ka Jylla kan sa ïoh bun ngut ki nongmihkhmat, kumba ka la ïoh jingjop ha ka Jylla Bihar.
Halor ka jingkam ka seng Congress ba ka kiew bha khamtam sha ka Garo Hills ba ki paidbah ki la phai khmat sha ka, u Momin u la kyntait war da kaba ong ba ka Congress ha Garo Hills kam donbor eiei ruh.
Haba jubab ïa ki jingkylli, u Momin u la ong ba, kam don kano-kano ka jingpyrshah ha ka jingïalam u Myntri Rangbah ka Jylla Meghalaya u Conrad K. Sangma bad u nongseng jong ka TIPRA Motha Pradyot Bikram Manikya Debbarma ïa ka ‘Northeast Regional Front’ kiba pyrshang ban wanrah ïa ka sur jong ka jingïatylli ha ka saiñ hima sima jong ka thaiñ ka thaiñ lam-mihngi jong ka ri India.
U Bah Wankitbok Pohshna, General Secretary jong ka BJP Meghalaya, u la ai khublei ïa ki paidbah nongthep Vote ka Jylla Bihar, ba ki la pynjop ïa ka Party bad u la ong ba ka jingjop jong ka party ha Jylla Bihar ka dei namar ka jingtrei shitom bad ka Party ka la lah ban lehbha ïa ki paidbah ka Bihar bad ha ka Ri India baroh kawei.
Ha kaba ïadei bad ka ilekshon ka ban sa long ha Garo Hills Autonomous District Council u Bah Wankitbok u la ong ba ïa mynta ki dang ailad ïa kiba kwah thep kyrteng ban long ki kyrtong ba ïakhun ïa ka ilekshon MDC ban sa long ha GHADC bad kham hadien ka party kan sa lah ban tip katno ngut kan buh kyrtong napdeng ki 29 tylli ki Constituency.
