Shillong, Naiwieng 14
Hadien ba ka Punjab Bank, kaba dei ka Main Branch ha Shillong, kaba la khot thungkam na ka bynta ka Local Bank Officer (LBO) khlem da bhah lang ïa ka ST, ka la pynlong ïa ka Hynñiewtrep Integrated Territorial Organization (HITO) hapoh ka jingïalam u Bah Donbok Dkhar, President ban leit ujor sha u Branch Manager jong katei ka bank, kaba don ha Khyndailad.
Haba kren sha ki lad pathai khubor u Bah Donbok u la ong, ki kam kiba lait ki don 8 tylli bad haba la peit bniah, ka SC ka don kawei, ka ST ka jah, OBC ka don 2 bad ka Un-Reserve ka don 5.
U la ong “Haba ong Local Bank Officer” kaba mut ba kan long donkam bha haba ïadei bad ka ‘Language Proficiency’, kaba mut ba kin hap ban tip ïa ka ktien Khasi bad Garo”.
U Bah Donbok u ong ba ka jingleit ka seng ban ujor ka long ba ha ka jaka jong ka ST ka mih pynban da ka SC, da kaba ong ba hato uta u bym dei u jaitbynriew nangne, u lah seh ban kren da ka ktien Khasi bad Garo?
Kumta u la dawa na u Branch Manager katei ka bank, ba u dei ban pynbeit noh mardor ïa ka nombor kaba 13 bad ka dei ban mih ha ka quota ST.
Nalor kata, u la kyntu bad ai mynsiem ïa ki para doh para snam ba kin thep ïa kane ka post Local Bank Officer.
Ha ka jingïakren, na ka liang u Branch Manager ka Punjab Bank u la kular ban shimkhia bad ban phah noh sha Guwahati ban pynbeit halor kane ka kam, la ong u Bah Donbok.
U la kyrmen ruh ba kum kine kin nym jia shuh nangne shakhmat.
