Shillong, Naiwieng 14
Ka Sorkar Jylla lyngba ka jingïalang ka kynhun Myntri ha ka sngi Thohdieng, ka la ai jingmynjur ïa ka jingthied jaka sa 35 akar ha Tynring, New Shillong Township na ka bynta ban pynkynriah ïa ka ‘Central Jail’, ka ban pynïasoh ïa ka ‘Administrative City’ bad ‘Knowledge City’.
U Nongaiktien ka Sorkar Jylla u Bah Wailadmiki Shylla haba kren sha ki nongthoh khubor ula ïathuh ba ka dor ban thied jaka ka long hapdeng ka T. 250 shi sq.ft bad T.2,691 shi sq.meter, kaba long hapoh ka dor ba la pyn-bna da ka Deputy Commissioner, kaba long T.2,900 shi sq.m.
U Bah Wailadmiki u la bynrap ruh ba ka jingïapynbeit ban thied ïa katei ka jaka ka la ïaid shakhmat bad ka jingtei ïa ka ‘Central Jail’ kan sdang tang mar ïa ïoh ïa ka jaka.
Kane ka sienjam ba la shim da ka Sorkar ka dei kum shibynta jong ka New Shillong Township Development Plan, ka ban don shibun ki projek ba kynthup ka ‘Administrative’ bad ‘Knowledge hub’ na bynta ban pynkylluid ïa ka Nongbah Shillong bad ban pynkhlaiñ ïa ka roi ka par ha ka thaiñ.
