Shillong, Naiwieng 16
Ka ïingbishar Meghalaya High Court kala phah notis sha u Lamphang ka ïingdorbar thawaiñ ka Jylla u Thomas A Sangma halor ka mudui jong ka Congress ba pyrshah ïa ka hukum jong u halor ka jingdawa ban mait kyrteng ïa ki MLA ba phet seng.
Ïa kane ka mudui la ai da u Secretary ka Meghalaya Pradesh Congress Committee (MPCC) Bah Manuel Badwar.
U Bah Manuel u la tynjuh pyrshah ïa ka hukum ba dang shen ba la pynmih da u Lamphang ka ïingdorbar thawaiñ kaba kyntait ïa ka jingmudui jong u ban mait kyrteng ïa ki 4 ngut ki MLA ka Congress kiba leit pynïasoh sha ka National People’s Party (NPP) kaba don ha ka Liang Synshar.
Ha ka jingbishar, u Advocate General A Kumar, bala ïarap da u Advocate ka Sorkar S Laloo, kila pdiang ïa ka notis na ka bynta u Lamphang.
Ha ka hukum ba pynmih ha ka sngi Thohdieng ka taïew ba la lah, ka ïingbishar ba khlieh da u Justice HS Thangkhiew kala hukum ban phah notis sha kiwei ruh ki kynhun liang mamla hapoh ka laisngi.
U Advocate General u la pynpaw ïa ka jingpyrshah haba ïadei bad ka jingbynrap lang ïa ka writ petition pyrshah ïa ki saw tylli ki hukum ba dang shah tynjuh.
Haba jubab, u nongïasaid jong u nongmudui u KV Kharlyngdoh u la kyrpad bad la ai jingbit ba un ïoh ïa ki jingbthah ïa kane ka kam, kaba la pynjlan ban bishar sha ka 8 tarik Nohprah 2025.
