Nongpoh, Naiwieng 16
Kan long ka sngi ba kmen bad kaba sah jingkynnmaw ïa ki paidbah, khamtam ïa ki khynnah pule ka thaiñ khappud jong ka Ri Bhoi bad Assam kaba hap ha ka thaiñ Umsohbar jong ka Jirang konstitwensi, Ri Bhoi District hadien ba u Myntri Rangbahduh ka Ri, u Narendra Modi u la buh mawnongrim lyngba ka ‘Video Conference’ na ka bynta ban tei ïa ka Eklavya Model Residential School (EMRS) kaba la kot sha ka jinglut kaba T.64 klur.
Haba ïashim bynta ha katei ka jingbuh mawnongrim ïa ka skul da u Narendra Modi lyngba ka Video Conference na Gujarat, u Myntri ka tnat Community & Rural Development ka jylla, u Bah Sosthenes Sohtun ruh u la wan ban ïadon ryngkat lem bad kiwei kiwei ki heh ophisar ha ka ophis treikam jong u Block Development Officer (BDO) ka Jirang C&RD Block ban sakhi ïa ka jingbuh mawnongrim.
Na ka liang u Bah Sosthenes Sohtun u la pynpaw ïa ka jingsngewkmen shikatdei halor ka jingurlong ban tei ïa kane ka skul, kaba na ka liang ka jong u hi shimet, u la dep ban phah jingthoh sha ka Sorkar Jylla ha ki snem kiba la leit noh bad hadien ka jingïoh jingmynjur, la pynlong ruh ïa ka jingjurip ïa ka jaka kaba yn sa tei ka skul hapoh ka shnong Umsohbar.
U Bah Sosthenes u la ïathuh ruh ba katkum ki kyndon ba la buh, ïa katei ka skul dei ban shna pyndep hapoh 36 bnai, kata kaba kynthup ïa ka ïing skul, ka jaka sah jong ki kynthei bad shynrang, ka madan ïalehkai basketball, volleyball, football bad kiwei kiwei de ki jait jingïalehkai.
Halor kane ka bynta, na ka liang jong u Bah Sosthenes u la pynpaw ïa ka jingaikhublei kyrpang bad sngewnguh ïa ka Sorkar Pdeng hapoh ka jingïalam u Narendra Modi kum u Myntri Rangbahduh ka ri bad ruh sha u Myntri Rangbah ka jylla, u Conrad K Sangma uba la shimkhia ryngkat ki heh ophisar ban pynurlong ïa katei ka jingangnud ka jong u bad ki paidbah nongshong shnong ka thaiñ.
