Shillong, Naiwieng 18
U Superintendent of Police (SP) ka East Khasi Hills District, u Bah Vivek Syiem u la ïathuh ba ka jingjia shah syllad ki arngut ki samla pule ka Skulbah NEHU ha kawei ka kali Maruti kaba la ñiah da u Parmen M Sangma, ki pulit ki la pynngat ha ka kyndon 109 jong ka BNS, kum ka jingthmu ban pynïap ïa kitei ki samla.
Kane ka jingjia tynrah utei u briew ïa ki ar ngut ki samla pule ka Skulbah NEHU, ka dei kaba la jia ha ka janmiet jong ka 17 tarik u Naiwieng 2025, ha Gate 2 NEHU. Katkum ka durkhih kaba la saphriang ha ki rynsan ‘social media’ la ïohi ba kane ka kali, kaba la pynher sted bha ka la syllad ïa ki ar ngut ki samla pule kiba dang ïaid lynti haduh ba ki la her sha suiñ bad hap jngai katto katne na ka jaka ba shah syllad.
Haba kren sha ki lad pathai khubor ha ka 18 tarik u Naiwieng 2025, u Bah Vivek Syiem u la ong, ba une u briew u dei u ‘Security Guard’ ha North Eastern Indira Gandhi Regional Institute of Health & Medical Science (NEIGRIHMS) Hospital bad uba sah pat ha katei ka Skulbah.
U Bah Vivek u la pyntip ruh ba une u briew ha ka por ba u leit tynrah ïa kitei ki ar ngut ki samla pule u la buaid, da kaba ong ruh ba naduh katei hi ka miet ki pulit ki la kem noh ïa u tei u briew bad la kurup ruh ïa ka kali jong u.
“Ka lynti ka long kaba ïar, kaba shai bad kaba ym lah ban long ba uno-uno uba ñiah kali un nym ïohi ïa ki briew. Kumta na ka liang ki pulit ki dang wad bniah shuh-shuh halor kane, ban lap ïa ki daw ba ïoh ka don ka jingthmu ban pynïap ïa ki,” la ong u Bah Vivek. Kine ki arngut ki samla ba shah tynrah, kata ka Daritngen Pohdukhei bad ka Stephanie Shadap nyngkong la rah sha Civil Hospital hynrei hadien kata pat la rah noh sha Nazareth Hospital, Shillong bad ki dang don ha ICU, la pyntip u Bah Vivek.
“Ngin sa ïalam ïa une u briew ban ‘tiañ bishar sha Ïingkashari lashai ka sngi bad ngin pan por ruh ban tohkit,” la bynrap u Bah Vivek.
Haba kylli, u Bah Vivek u ong ba ki pulit ki dang ap ruh ïa ka kaiphod u Motor Vehicle Inspector (MVI) ban pynthikna, la ka don ne-em ka jingthut ha ka kali, kaba lam sha kane ka jingjia aksiden.
