Shillong, Naiwieng 18
U Bah Bindo M Lanong, uba dei u nongïasaid aiñ bad ruh u Lamphang barim ka Ïingdorbar Thawaiñ ka Jylla, u la pynpaw ka jingbym sngew ïahap halor ka jingpynngat kyndon jong ki pulit da ka kyndon 351 jong ka BNS ïa u nongshah kynnoh leh beijot ïa ka khynnah 10 snem.
Lah ban kdew ba ha kawei ka jingjia ha South West Khasi Hills District, kawei ka longkmie ka la ujor da ka ejahar ha thanad Mawkyrwat da kaba kynnoh ba u lok jong ka u la leh be-ijot bad byrngem byrsit ïa la ka jong ka khun kaba dang 10 snem. Ki pulit kiba la kem noh ïa une u briew, ki la register ha ka cog case WPS C/no.13/2025 U/S 5(m)(n)/6 R/W Sec 351(1) BNS.
Ha kaba ïadei bad kane ka jingpynngat kyndon, u Bah Bindo u la ong ba katkum ka jingmih ka khubor, ka jing ‘register case’ ki pulit da ka kyndon 351 ka section jong ka BNS kan pynlong ïa ka case kaba tlot, ha ka jingshisha ïa ka ‘case’ la dei ban ‘register’ ha ka Section 63 bad 64 jong ka BNS.
“Katkum ki kyndon ba la pynngat ïa utei u briew ba la shah kynnoh leh beijot da ka kmie ka khynnah, kata ka section 351 jong ka BNS, ka long ba kane ka kyndon kam ïahap satia bad ka khubor kynnoh leh beijot. Kum u riew said aiñ, nga sngew ba kane ka kyndon 351 ka dei pynban ka ‘Criminal Intimidation’ kaba mut ka kyndon kaba ïadei beit bad ka jingbyrngem shoh ne byrngem pynïap,” ong u Bah Bindo.
U la buh jingkylli ruh ba balei pynngat hapoh ka kyndon 351, kaba mut tang ka jingbyrngem, kam dei ban hap satia hynrei dei ban pynngat ha ka kyndon 63 bad 64 jong ka BNS namar kam ïahap bad ka jingjia leh beijot, kumta ha kano ka rukom ba ki pulit ki register ïa kane ka kam kumba kynnoh ka kmie ba ka shah leh beijot.
