Shillong, Naiwieng 20
Ki lai tylli ki seng kiba don ha skulbah North Eastern Hills University ba kynthup ka NEHU Teacher Association, NEHU Student Union (NEHUSU) bad Non-Teaching Staff Association (NEHUNSA) ki la dawa ïa ki bor pynïaid ka skulbah ban plie noh mardor ïa ka Gate-I jong katei ka skulbah.
Kane ka jingdawa ki lai seng ka la wan hadien ba ka la don ka jingjia shah tynrah ar ngut ki samla pule ka skulbah ha kawei ka kali kaba la pynher sted ha ka janmiet 17 tarik kaba la jia ha Gate-II.
Haba ïoh ban ïakren bad u Prof. Lakhon Kma President ka NEHUTA u la ïathuh ba ha ka ‘Executive Meeting’ ba la long ha nongbah Delhi ha ka 30 tarik u Jymmang 2025, la dep rai ban pyntreikam noh ïa ka Gate-I, naduh katei ka por haduh mynta hynriew bnai ka la ïaid ka por, hynrei khlem pat leh eiei haduh mynta.
“Lada ka University kam lah ban plie (inaugurate) ïa ka Gate-I, ngi ki seng ka NEHUTA, NEHUSU bad NEHUNSA ngin ïa plie hi ma ngi, ba ka Gate-I bad Gate-III kin long ki ban rung hapoh ka skulbah bad ka Gate-II kan long na ka bynta kiba mih”
U Prof. Lakhon u la ong ba, lada la plie ïa ka Gate-I ban pynlong ïa ki kali kiba rung hapoh ka skulbah bad ka Gate-II kan dei tang ka khyrdop ba ki kali kin mih na ka skulbah, lehse kan lah ban ïarap ban pynsuk ïa ka jingrung jingmih ki kali bad kiba leit ba wan hapoh ka skulbah.
Kumta u la buh ka jingkyrpad ïa ki bor ba dei peit jong ka skulbah ba kin pynkloi noh katba lah ban ïoh ban plie noh ïa ka Gate-I khnang ban ïoh pyndonkam noh bad ba kan long ka jingmyntoi ïa ki khynnah pule, ki nongtrei bad kiba leit ba wan donkam ha ka skulbah.
