Jowai, Naiwieng 20
U Chief Executive Member (CEM) jong ka JHADC u Ma Thombor Shiwat u la ïathuh ba ka Executive Committee ka la rai ban pdiang ïa ka jingtyrwa ban siew tulop da ka Sorkar Meghalaya ryngkat bad ki kyndon kiba tyngeh khnang ban pynneh ïa ka jinglaitluid jong ka JHADC. U CEM u la ïathuh ïa kane haba jubab ïa ka motion ba la wanrah da u MDC ka VPP na Jowai North u Ma Awhai Andrew Shullai ha ka Dorbar Tlang kaba la long ha ka sngi Palei ka 20 tarik Naiwieng.
U Ma Andrew u la ong ba katei ka jingtyrwa siew tulop da ka Sorkar Jylla ïa ki MDC bad nongtrei jong ka JHADC kam long kaba shai, kumta u kwah jingshai hato ka Council ka la pdiang ne kyntait bad ki kyndon aiu.
U Ma Thombor u la ïathuh ba ka Executive Committee ka la rai ban pdiang ïa katei ka jingtyrwa ban siew tulop da ka Sorkar namar ka jingkyrduh pisa jong ka Council kaba la wanrah ïa ka jingeh ban siew tulop bad baibam tymmen jong ki MDC bad nongtrei jong ka.
U Chief Executive Member jong ka JHADC u la ïathuh ba ka Executive Committee ka treh ban pdiang ïa katei ka jingtyrwa siew tulop da ka Sorkar lada kan nym don kano kano ka jingktah ïa ka jinglaitluid treikam jong ka JHADC bad kan nym don kano kano ka jingtuklar na ka Sorkar Jylla.
