Shillong, Naiwieng 20
U Prof. Lakhon Kma uba long uwei na ki nonghikai ka North Eastern Hills University u la kynnoh ba jingjia shah tynrah ki arngut ki samla pule ha ka janmiet 17 tarik Naiwieng 2025 ha khyrdop ka skulbah ka dei namar ka jingdkoh ki bor pahara, ba sa ïoh laitlan kiba rung ba mih.
Haba ïakren sha ki nongthoh khubor ha ka sngi Palei, u la ïathuh ba ki la dawa ba ïa ka ‘Camp Security’ kaba don hapoh ‘Campus’ jong ka skulbah, dei ban pynduh pyndam noh namar kam dei ka kam jong ka NEHU ban pynbiang jaka sah ïa ki nongtrei Security, namar kane ka jia dei ba u Parmen M. Sangma u leit sha katei ka ‘Camp’.
U Prof. Lakhon, u la kdew ba ka jingdkoh jong ki nongpahara hapoh ka skulbah ka dei namar ba ka ‘Agency’ ba thungkam, kam peit bniah ïa ki briew haba ka thungkam, ki briew kiba dih buaid, kiba kren khlem akor bad kiwei-kiwei.
Shuh-shuh u la ong, watla ka ‘Agency’ ka la weng kam ïa utei u briew ba ñiah kali khlem akor bad ki pulit ki la kem, kumjuh la pynngat kyndon ruh ïa u, ka ‘Agency’ ka dei ban bahkhlieh ïa kane ka jingjia bad ka jinglut jingsep haba ïadei ki jingsumar ïa kiba la mynsaw.
“Haba peit ïa ka khyrdop-II (Gate-2), ym don ba peit ïa ka jingrung jingmih, kiba leit ba wan ki ïoh rung katba mon bad ki nongap pahara (Security) ki shu shong ban ïathuh khana, ka jingpynlut pisa ban siew tulop ïa ki, ka lehnohei kai bad ka jingïoh jingsiew tulop ïa ki kam ïahap shuh bad ka kam ba ki trei” u la ong. Halor kane u la dawa ba dei ban ‘blacklist’ noh ïa kum kine ki ‘Agency’ ban pynïaid Security hapoh NEHU bad dawa ban buh da kiwei ki ‘Agency’ kiba biang ka rukom treikam.
Kum ban shu kdew hangne ha ka janmiet 20 tarik Naiwieng, ka NEHU Student Union (NEHUSU), NEHU Non- Teaching Staff bad NEHU Teacher Association, ki la pynlong ïa ka jingduwai kyrpang na ka bynta ka Samla Stephanie Shadap bad ka Samla Daritngen Pohdukhei ba kin koit noh.
