Shillong, Naiwieng 20
Uwei u samla ba dang 25 snem ka rta na Kamrup, Assam, uba sah mynta ha Nongshilliang, u la shah kem noh naba leh shongshit bad thmu kiew hajrong rynsan rwai jong u Tyga ha ka tamasa Shillong Cherry Blossom 2025 kaba dang shu kut shen.
U Superintendent of Police (SP) ka East Khasi Hills u Bah Vivek Syiem u la pynthikna ïa ka jingshah kem ha ka sngi Palei, da kaba pynpaw, “U la shah kem namar ba u la thmu kiew sha rynsan rwai ha ka por jong ka tamasa.”
Katkum ka jingong jong ki Pulit, ka la don ka jingujor ejahar (FIR) da ki nongpynïaid jong katei ka tamasa hadien katei ka jingjia.
La kynnoh ba utei u samla u leh pyrshah da kaba thmu kiew ha rynsan rwai ha katei ka tamasa.
La kynnoh ruh ba une u samla u la don ka histori naduh mynshwa ban rung tuh sha ki tamasa bapher-bapher ha ki por ba la leit, wat ha ka tamasa Cherry Blossom ha u 2024 ruh u la rung tuh, kumjuh ruh ha ka concert jong u Ed?Sheeran da kaba leh mynleh kum u nongap pahara da kaba phong ïa ka vest ba rong jyrngam.
