Shillong, Naiwieng 20
Ka Garo Student’s Union (GSU), Eastern Zone ka la aiti da ka jingthoh sha u Myntri ka tnad pule puthi ka Sorkar Jylla, u Bah Lahkmen Rymbui ban kyntu ban mang tyngka na ka bynta ki kam ha Loyala College, Williamnagar ha East Garo Hills District.
Ha ka shithi ba la phah sha u Myntri, ka GSU ka la pynpaw ba ka Loyala College ka dei kaba la ñiew paidbah kum ka ‘People’s College’, kaba shakri ïa kiba bun ki samla pule kiba wan na ki shnong kiba kham duna ha ka liang ka ïoh ka kot bad kiba wan na ki thaiñ nongkyndong, ka East Garo Hills District.
Ka GSU ka la ong ba katba kiwei pat ki ‘People’s College’ ha ka Jylla ki la dep ban ïoh ïa ki kam ba la mang tyngka bad ki nonghikai jong ki, ki la sdang ban ïoh tulop, hynrei ka Loyala College haduh mynta kim pat don ki kam ba la mang tyngka ne kiba la mynjur da ka Sorkar.
“Ka jingpynslem ban mang tyngka ka la buh jingeh ïa ki nonghikai bad ka la ktah ïa ka jingïaid beit jong ki kam pule puthi, da kaba ktah ïa ka lawei jong ki khynnah skul” la ong ka GSU.
“Namar kata, da ka jingsngewrit ngi kyntu ïa ka ophis ba donburom jong phi ba sngewbha ban pynsted bad pyndep kloi ïa ka jingmynjur ban mang tyngka ïa ki kam ha Loyala College” la bynrap ka GSU.
