Shillong, Naiwieng 20
U Chairman ka Meghalaya Commercial Truck Owners and Drivers Association (MCTODA) Bah Moslander Marngar u la ïathuh ba dei ki pulit bar jylla kiba shoh ïa ki nongñiah trok ha ka jingïakulmar myn ha ka 4 tarik mynta u bnai ha Mawryngkneng, East Khasi Hills District.
Haba ïakren bad ki nongthoh khubor ha Shillong Press Club, u Bah Moslander u la pyntip ba ka seng kan nym ai ejahar ne leit ujor sha ka Meghalaya Human Right Commission namar haba khatduh yn ïatyngkhuh para Khasi kaba mut ki riew paidbah pyrshah ïa ki ophisar kiba rit, ki pulit.
U la ong ba lada ai ejahar yn ngat ki magistrate bad pulit Khasi namar kata kin nym ujor shuh namar ki la ïohi ba ki kompeni bad ki heh Sorkar ki wanrah da ka jingpharia jaitbynriew.
Shuh shuh u la ong ba ki kompeni pynmih dewbilat sha rilum Jaiñtia ki long kiba khlaiñ bor haduh ba ki lah ban wanrah ïa ka “divide and rule policy” kumba leh ki phareng haba ki wan khaïi sha ri India ha ki por mynshwa.
U la ïathuh ba ki don haduh 3 ngut kiba mynsaw na ka jingshah shoh ha ki pulit bad bun kiba mynsaw ha jingjia ha Mawryngkneng.
Shuh shuh u la ïathuh ba ki para dkhot kiba la mynsaw kim shym la pan jingïarap bai dawai na ka seng hynrei kin pynlut hi haba ki shah sumar namar ki mih hi sha surok ban dawa ïa ka hok.
Katba u Bah Banshemstar Mawthoh uba na Mawryngkneng u ïathuh ba ha ka 4 tarik mynta u bnai u la ap ha surok ban phah pynphai kali hynrei shu ïoh sngew ba wan u bom bad shu sat khmat bad ki pulit bar jylla ki la bom ïa u hynrei sa shiphang ki la pyllait noh ïa u.
U la ïathuh hadien kata kine ki pulit ki wan tan ïa u marwei ban ïalam hapdeng surok ban kynnoh ba u la tuh ïa u shabi trok bad ïalam ruh sha thanad haduh ban da shai ka bneng.
Shuh shuh u la pyntip haba u la kwah leit ïing palat, ki la phah soi ïa ka kot kumta da ka mynsiem kaba khuid u la soi namar u kwah leit ïing hynrei khlem poi pyrkhat ba kane ka kot ba u la soi ka dei ka ejahar ban ujor pyrshah ïa ki para ba ñiah trok.
Kumta u la kyntait ba um don bynta ban ai ejahar namar kumno yn ujor haba ki la shah bom lang ha ki pulit.
U la ïathuh ba ka jingshim kabu ki pulit ban phah soi ka dei tang namar ba um nang ban thoh bad ban pule.
Kum ban shu pynkynmaw ki nongñiah trok ki la ïeng ha Mawryngkneng ha ka 4 tarik Naiwieng ban pynphai ïa ki trok jong ki kompeni kiba kit dewbilat bad hangne la mih ka jingmynsaw haba la wan ki pulit kiba synran ïa ki trok.
