Nongstoiñ, Naiwieng 20
Ka Hynñiewtrep Youths’ Council (HYC) West Khasi Hills District ka la pynkhreh da ka jingïakhih lada ym lah ban pynmih risol shwa ka Khrismas.
Ka HYC West Khasi Hills District hapoh ka jingïalam u samla Lumlang Kharsyiemlieh, President bad samla Wanteibok Lyngdoh, General Secretary ryngkat kiwei ki para nongïalam, ki dkhot bad katto katne ki samla wadkam hapoh West Khasi Hills, ha ka 19 tarik mynta u bnai ki la leit ban ïakynduh biang ïa u DC ka West Khasi Hills District u Bah Garod LSN Dykes halor ka jingkular ban pyllait bad pynmih noh ïa ka risol DSC kaba la dep eksam, shuwa ban phah thoh eksam biang ha ka 22 bad 29 tarik Naiwieng 2025.
Ki nongïalam ka HYC, ki la ong ba hadien ka jingkynduh bad ha ka jingïakren bad u DC, na ka liang ka seng ka la dawa beit ban pynneh ïa katei ka sur ba la ong mynshuwa, hynrei ha ka jingïatai sani bha na ka liang u DC u la ong, mynta ban pynmih noh ïa ki risol kam pat long namar ka jingthut ha ka ‘technical team’ ba peit ïa ki kam DSC ha ki kam eksam.
Ki la ong ruh ba na ka liang jong u DC u la ong ba u kwah ban pyndep noh shuwa ka Khrismas, nangta la ong ruh ba ïa kiba shu thung ‘Contract Basic’, ‘Officiating’ bad kiwei ba shu thung shipor, u DC un pynkut noh ha ka 30 tarik u bnai Nohprah, 2025.
U Samla Lumlang u la ong, na ka liang jong ka seng ka la ïa kut bad ka rai kaba khatduh kan ap ïa kata ba shuwa ka Khrismas ban pynmih risol jong ka eksam ba la dep bad ki ban leh mynta u bnai bad lada kam seisoh ka HYC kan lum ïa ki samla wadkam bad ban pynkhreh jingïakhih.
