Shillong, Naiwieng 20
Ka Don Bosco Media Network (DBMNTV) ka la pynbna paidbah ba kan sa pynlong biang ïa ka rynsan ïakob rwai, kaba la tip kum ka ‘Sur Kynud’ season 4.
Kane ka rynsan ïakob la shna khnang ban kyntiew ïa ka sap rwai kaba kyrpang kaba la shem ha ka Jylla Meghalaya.
Ka ‘Sur Kynud’ kam dei tang ka rynsan jingïakob rwai hynrei ka dei ka jingailad ïa ki nongrwai ba dang khie dang san ban pyni ïa ka sap, ban ïoh ïa ka jingithuh, bad ban plie lad ïa ki nongjop ban ïakop ha ki rynsan ha ka ri bad ha ka pyrthei.
Ïa ki nongjop ha kane ka aiom yn sam ïa ka khusnam pisa ba kaba T.1 lak bad kin ïoh ruh ban mihkhmat ïa ka Jylla Meghalaya ha ki jingïakob rwai ba pawnam ha kylleng ka ri India bad shabar ruh kumjuh.
Haba kren sha ki lad pathai khubor ha Shillong Press Club ha ka 20 tarik u Naiwieng 2025, u Bah OL.Marbaniang u la ïathuh ba ka ‘Sur Kynud’ ka la ïaid mynta la lai snem bad ka la sei ruh ïa ki khynnah bad ki samla ban rah ïa ka nam lahduh ha ki snem ba la dep.
“Kane ka rynsan jong ngi, ka ailad ïa baroh ki khynnah kynthei bad shynrang kiba don ïa ka sap ban rwai ban siaw,” la ong u Bah OL.Marbaniang.
U Bah OL.Marbaniang u la pyntip ruh ba ka bai rung ïa kiba kwah ïashim bynta ka long T.1 hajar tyngka bad ka khusnam sha ki nongjop ka long T.1 lak tyngka. “Ha kane ka jingïakob ka long tang kawei ka khusnam, namar kino-kino ki khynnah ne ki samla ba ïoh ïa kane ka khusnam ngi ai ruh ba kin leit ïakhun sha baroh ki ri ka pyrthei” u la bynrap.
Kumta u la kyntu ïa ki khynnah bad ki samla kiba don ïa ka sap rwai ba kin wan ban ïa shimbynta ha kane ka jingïakob rwai.
