Shillong, Naiwieng 20
Ka Hynñiewtrep Youth Council (HYC) hapoh ka jingïalam u President, u Bah Roykupar Synrem ki la leit ban ïakynduh ïa u Deputy Inspector General (DIG), ka Central Bureau of Investigation (CBI), u Promod Manjhi, halor ka jingïoh jingujor ba ki la tei ïa ka jaka mane blei ha phyllaw jong katei ka tnad treikam, kaba don ha Mawdiangdiang.
Haba kren sha ki lad pathai khubor, u Bah Roykupar Synrem u la ïathuh ba u Promod Manjhi u la pyntip ba katei ka jingtei kam dei ka jaka mane blei, hynrei kadei ka Community Hall ban pyndonkam kiba sah ha katei ka jaka.
U Bah Roykupar u la maham tyngeh ruh ba lada jia ba katei ka Community kan kylla sha ka jaka mane blei ka seng kan sa shim pat da kiwei ki sienjam.
“Hashwa kane, ka seng ka la dep ban phah ruh ka shithi sha u heh ophisar ka CBI, ban pan jingshai halor ka jingïoh jingtip ba la thmu shna ïa ka jaka mane blei ha phyllaw katei ka jaka. Lada jia ba ka don shisha kum kata ban shna ïa ka jaka mane blei ha phyllaw ka CBI, ka long pyrshah ïa ka riti synshar jong ka ri India,” ong u Bah Roykupar.
U la ong “Ka ri India ka dei ka ri ka bym ju shah liang ha kano-kano ka niam bad lada ka mih kaba kum kata ka jaka mane blei ha kane ka tnad treikam jong ka CBI, ka pynpaw ba kane ka ophis kam long laitluid shuh.
Ha ka jingïa kynduh, u Bah Roykupar u la ong ba u Promod u la kren shai ba hapoh ka CBI, kam shem don kano-kano ka jingthmu ban shna jaka mane blei, da kaba ong ruh ba katei ka jingtei ba la shna mynta ka dei ka Community Hall, khnang ban ïoh pyndonkam kiba sah ha katei ka jaka.
“Ka seng hi ka la kren da kaba shai ïa u DIG, ba lada ka dei shisha ka Community Hall ka seng kan nym don kano-kano ka jingpyrshah hynrei lada jia ba ki pynlong ïa katei ka jingtei kum ka jaka mane blei da lei lei ruh ngin nym shah ïa kaba kum kata,” la ong shuh-shuh u Bah Roykupar.
“Ngi ngeit ba kane ka jingïakren jong ngi bad u heh ophisar nalor kiwei pat ki ophisar ba ïa donlang ba kin bat ïa la ka jong ka ktien bad kan nym don ka jingpynkylla hadien habud,” u la bynrap.
Ki nongïalam ka seng ha ryngkat ki ophisar ka CBI, ki la leit ban jngoh ruh ïa katei ka jingtei kaba ki dang pyntrei mynta.
