Shillong, Naiwieng 21
Kiba wan peit ïa ka phlim Sianti ha Bijou Cinema Shillong ki la pynpaw ba kane ka phlim ka thew ïa u briew uba arsap namar hakhmat ki long ki briew kiba bha katba shapoh ki don da kawei ka jinglong kaba sniew haduh ban shim ïa ka jingim jong ki briew.
Kane ka dei ka phlim Sianti kaba la sdang ban pyni ha ka 21 tarik Naiwieng 2025 ha Bijou Cinema, Khyndailad naduh ka por 11:30 mynstep, 2:15 baje nohphai sngi, 4:50 janmiet bad 7:30 mynmiet.
Ha kane ka sngi sdang kiba shimbynta naduh ki tyngshop bad ki puron ki la wan ban sakhi ïalade ha Cinema ryngkat ka jingïadonlang ki trai ba pynmih ïa kane ka phlim.
Haba ïakren bad ka trai jong kane ka phlim ka Kong Ashamary Syiemiong ka la ïathuh ba kane ka dei ka sien kaba nyngkong ban pynmih phlim.
Ka la ong ba ka jingmut Sianti ka long ban pyni ïa ki briew ba najrong ki long kiba bha katba shapoh ki long kiba arsap.
Shuh shuh ka la ïathuh ba don shibun ki jingeh ha kane ka kam shna phlim hynrei ka sngewkmen ba la lah ban pyni ha Bijou Cinema Shillong.
“Ki jingeh kiba nga ïakynduh kadei ha ki kot ki sla, ki bun ba nga hap ban pyndep, hynrei dei na ka jingïarap u Bah Kenney Lyngdoh kaba la pynlong ïa kane ka phlim ban mih ha Cinema” ka la ong.
Ka la ïathuh ruh ba ka jingmih shakhmat ban shna phlim ka long ban aikam ïa ki samla ha kane ka juk kyrduh kam.
Ka la pyntip ruh ba don shibun ka jinglut namar ka dei kaba nyngkong, la long kumba shu thied da ka pisa ïa ki jingdonkam baroh hynrei mynta haba ka la sngewthuh kan bteng biang ban shna phlim.
Haba ïoh ban ïakren bad ka Flebia Lyngdoh kaba dei ka puron ka la ïathuh ba ka la poi ban ak ha kane ka phlim Sianti dei ba ka wan leh ‘audition’.
“Nga don da kawei ka kam ba nga trei hynrei nga kwah ban pyrshang ïa kane ka kam ak phlim khnang ban lah ban pynïapher ïa ka kam ba nga trei” ka la ong.
Katba u Michael Pyngrope u la ïathuh ba ha kane ka phlim u la ak kum u paralok u Shongdor uba dei u tyngshop ban synran ïa u kat shaba u leit.
