Mawkyrwat, Naiwieng 21
Hadien ka jingjop jong ka skhim JJM ha Pyndendiwah, South West Khasi Hills District ha kaba baroh ki longïing ki la ïoh ïa ka umbam-umdih kaba biang, na ka liang u Executive Engineer PHE Mawkyr-wat Division, u Bah K. Nongbsaw ryngkat u Bah Steven Wahlang, District Project Manager, JJM SWKHD ban pyntikna ba baroh ki shnong ha ka distrik kiba pyntrei ïa ka skhim JJM kin ïoh ïa ka umbam-umdih, ha ka 21 tarik u Naiwieng, 2025 ki la hiar jurip sa ïa ka skhim JJM ha shnong Jashiar hadien ba ka tnat PHE ka la dep aiti ha ka VWSC ha u snem 2023 kaba la pyntrei ha ka jinglut kaba T. 43 lak tyngka.
Ha kane ka jingjurip la lap ba ka jingpyntrei ïa ka skhim JJM ha ka shnong Jashiar ruh ka la long kaba jop ha kaba baroh 58 tylli ki longïing, ki skul bad ki Aganwadi Centre ki la ïoh ïa ka umbam-umdih kaba biang.
Kane ka shnong ka la ïoh ruh ïa ka jingithuh kum ka ‘Har Ghar Jal Village’ kaba baroh ki longïing longsem, ki jaka ai jinghikai , ki jaka sumar ki la ïoh ïa ka umbam-umdih.
U Bah K.Nongbsaw haba ai jingkren u la pynpaw ïa ka jingsngewkmen kaba khraw ban ïohi ba ka jingpyntrei ïa ka skhim JJM ha ka shnong Jashiar ka la long kaba jop ha kaba ki longïing longsem baroh ki la ïoh shisha ïa ka jingmyntoi lyngba kane ka skhim.
U la ai khublei ruh ïa ka VWSC bad ki nongpynïaid shnong kiba la ai ka jingïatreilang ha kaba la lah ban pyndep ïa kane ka skhim bad ban pynpoi um sha man la ki thliew ïing bad u kyrmen skhem ruh ba kane ka skhim JJM hapoh kane ka shnong kan ïai long ka jingshakri ïa ki paidbah nongshong shnong.
Na ka liang ki nongïalam shnong Pyndendiwah bad ki paidbah ki la ai ka jingkhublei kyrpang ïa u Myntri Rangbahduh ka Ri India, u Narendra Modi uba la pynïoh ïa kane ka skhim bad ki la ai khublei ruh ïa ka ophis u Executive Engineer PHE, Mawkyrwat Division kaba la pynbit pynbiang ïa ki jingdonkam baroh ha kaba ïadei bad ka jingpyntrei ïa kane ka skhim.
