Shillong, Naiwieng 24
U Nongïalam ka Congress ha Meghalaya u Bah Vincent H Pala u la kynthoh ïa ka Executive Committee (EC) ba la ïalam da ka VPP ha Khasi Hills Autonomous District Council (KHADC), da kaba ong ba ka jingtreikam jong ka, ka la pynduh jingkyrmen ïa ki nongthep vote, da ki jingkular bym lah pyndep.
“Na kaei kaba nga ïohi, kam dei kumba ki paidbah ki la khmih lynti. Ka BJP bad ka NPP ki la lah bad nang bha kumno ban khroh bad thied ïa ki nongïalam bad nongmihkhmat, hynrei ka jingïakynad hapoh ka VPP kan sa pynthait noh shen ïa ki paidbah,” ong u Bah Pala.
U MP barim ka Shillong u la pynpaw ba u la ïoh pdiang ki jingtyrwa na ki dkhot ka VPP kiba kwah ban ïasoh bad ka Congress, kaba pyni ïa ka jingbym sngewhun hapoh ka seng.
“Ki don bun ki briew na ka VPP kiba la phone ïa nga bad pynpaw ïa ka jingkwah ka jong ki ban ïasoh bad ka Congress (namar) ki sngew ba ka rukom treikam jong ka VPP kam dei kumba ki la mutdur,” u la ong.
U la bynrap ruh, “Lehse namar ka jingbym don ka jingshemphang, hynrei ryngkat ka jingkitkhlieh ka wan ka jingdonkam ïa ki nongai jingmut kiba la tbit. Ki don da ki spah ngut kiba kloi ban ïalam ïa ki-ki ophisar, ki riew shemphang. Ban ong ‘ngim don jingshemphang’ hadien lai bnai kam long kaba lah ban pdiang. To leh ïa ka ‘homework’ jong phi.”
Halor ka jingïasaidnia kaba la mih na ka ‘professional tax’, u Bah Pala u la kynnoh ïa ka VPP ba ka la kyrtoh kylla ïa ka jingkynnoh.
U Bah Pala u la ong, “Ki la kynnoh kylla ïa ki ophisar, hynrei ka jingshisha ka la paw kloi. Ki jingthmu kim ïahap bad ki jingkular kiba heh. Ki la dei ban wad jingïarap na ki ophisar kiba la shongthait. Kam long kaba suk ban long nongmihkhmat paidbah, ngi donkam ban ïamir jingmut, pynbeit, ïalam da ka jingsngewrit.”
U Bah Pala u la ïathuh lypa ïa ka jingbym shong shngaiñ, da kaba kdew ïa ki jingkular ba khlem pyndep bad ki jingïakynnoh mar kylliang bad ka Sorkar Jylla.
“Haba peit ïa ki jingkular heh ki jong ki, ka jingkylla ki long bym lah kiar. Phin nym lah ban pynbor ïa ka jingkiew; ki jingmih ki donkam ïa ka jingshai. Peit ïa ka Aam Aadmi Party-ki la ai ki jingkular kiba khraw hynrei ha kaba kut hadien ba ki la wan ha ka bor shiteng na ki briew jong ki, ki don ha phatok mynta. Ka VPP ruh ka ong ba kan ai ïa ka jingsynshar kaba khuid hynrei ki khyrdop pat ki la nangbun. Ki dei ban pyndep ïa ka jingkular hynrei paw pynban tang da ki kam ïakynnoh mar kylliang, ka Sorkar Jylla pyrshah ïa ka KHADC bad ki nongshah ktah kiba shyrkhei tam na kane ka drama saiñ pyrthei kin dei ki briew jong ngi,” u la ong.
