Shillong, Naiwieng 24
Ka Seng Samla Hima Langrin (SSHL) hapoh ka jingïalam u Bah Blodingwell Langrin ha ka 24 tarik u Naiwieng 2025, ki la leit ban buh ïa ka jingkynthoh sha ka ophis Joint Secretary Incharge Elaka, KHADC, halor ka kaiphod jingtohkit (Inquiry Report) jong u snem 2023 ba la dep, ba la buh da ka Seng Samla Hima Langrin ryngkat bad ki khun ki hajar halor ki kam leh bakla da u Syiem ba la shah sospon, u Pa’iem Nongtei Sing Syiemiong.
Kane ka jingleit ai jingkynthoh ne ai comments kadei halor ka jingujor jong ki samla ka Hima Langrin pyrshah ïa u Pa’iem Nongtei Sing Syiemiong ha u snem 2023.
Haba kren sha ki lad pathai khubor, u Bah Blodingwell Langrin u la ïathuh ba hadien ba ka Konsil ka la phah sha ka seng samla ban ai ka jingkynthoh halor kane ka kaiphod ba la dep bishar, ka seng samla kumba la ïalam ïa ki paidbah ha u snem 2023, mynta ruh ki la leit ban ai ka jingkynthoh halor ki katto-katne ki mat ba kim hun ïa ka kaiphod.
“Ngi shaniah ha ka Konsil ba kan ai ïa ka rai kaba bha tam na ka bynta ki khun ki hajar jong ka Hima Langrin,” la ong u Bah Blodingwell Langrin.
U la ïathuh ba ka jingleit ai jingkynthoh ka Seng Samla Hima Langrin sha ka Konsil kadei halor ka mukotduma ba ki la dawa na ka Konsil ba ka dei ban sospon noh ïa u Pa’iem Nongtei Sing Syiemiong bad ka jingtohkit ka la ïaid mynta la 2 snem bad u kyrmen ban ïoh ïa ka jubab kaba bha.
Kumta u la kyrpad ïa ka Konsil ban peit bha bad ruh ban ai ka jingbishar hok katkum ba ki khun ki hajar ka Hima ki thrang ban ïoh.
