Shillong, Naiwieng 24
Ka Khasi Students’ Union (KSU) West Khasi Hills District Unit hapoh ka jingïalam u samla Robin N Nongrem, Assistant General Secretary ha ka 24 tarik u Naiwieng 2025, ki la leit khynra naphang ïa ki bar jylla kiba wan trei bylla ha ka Shnong Mawrang, Eastern West Khasi Hills.
Ka KSU ha ka jingkhynra, ka la lap ba 2 ngut ki Nongtrei bar jylla kim shym don ki kot ki sla kiba biang.
Kumta ka KSU ka la ai por ïa u kontraktor uba pyntrei ha katei ka shnong, ba u dei ban pynmih mardor ïa kine ki bar jylla hapoh 24 kynta bad leit buh ïa ki sha ka jaka ba ki wan.
Ka KSU ka la kyntu ruh ïa ki nongïalam shnong, ba kin peitngor halor ka jingrung kyrthep ki briew kiba nabar jylla wat shaduh ki kyntoit shnong kiba rit khlem da don ki kot ki sla kiba biang.
Ka la ong ruh ba kane ka long ka jingpynkheiñ ïa ki aiñ shnong, namar khlem da pan jingbit na ki nongïalam shnong, kine ki bar jylla ki ïoh ban wan rung ban trei bylla hapoh shnong.
