Shillong, Naiwieng 24
Ka Khun Hynñiewtrep National Awakening Movement (KHNAM) ka la kynthoh ïa ka “Mission for Youth Empowerment” (MYE) jong ka Sorkar Jylla da kaba kynnoh ba katei ka skhim ka la kylla long pynban kum ka jingïalap saiñ pyrthei.
Kane ka jingkynthoh ka la wan hadien ba ka seng ka la sakhi ba ïa ka dur jong u Myntri Rangbah ka Jylla, u Conrad K. Sangma la buh lypa kum ka ‘Wallpaper’ ka bym lah ban kylliang ha ki ‘Tablet’ ba la ïoh pdiang da ki khynnah pule klas XII ha ka Lah Sngi U Blei.
“(Ngi) sngewlyngngoh ba ïa ka dur jong u Conrad K. Sangma la buh lypa da ka ‘Default’ kum ka ‘Wallpaper’ ha ka ‘Tab’ bad ym lah ban kylliang ïa ka. Ngi la ïohi ruh ha ki por ba la dep ba wat ha ka “CM Guide Book”, ka jingsop jong ka kot ka don ïa ka dur jong u Conrad K. Sangma,” la ong u Working President ka KHNAM, Bah Thomas Passah ha ka kyrwoh.
“Ngi ïohi ïa kane kum ka jingïalap saiñ pyrthei bad ym kum ka jingthmu ban pynkupbor ïa ki samla,” u la kynnoh da kaba bynrap, “Ka long kaba bakla ïa u Myntri Rangbah ban buh jubor ïa ka dur jong u ha ki ‘Tab’ ba la pyndonkam da ki ‘riew shimet khamtam haba ïa kum kine ki mishon ne ki skhim ba la sdang da ka Sorkar ki long lyngba ka jinglut na ka pla tyngka bad ym na ka jingpynlut jong u Conrad K. Sangma.”
Haba buh kylli ïa ka jingmyntoi jong ka skhim, une u nongïalam ka KHNAM u la ong, “Hynrei, la kine ki ‘Tab’ kin ai jingmyntoi ne em ïa ki samla pule, ym pat tikna, namarba la ïathuh ba kine ki ‘Tab’ kim neh slem hynrei, ngi tikna ba kine ki ‘Tab’ kin ai jingmyntoi ïa u kontraktor ne u nongsaplai uba la saplai ïa ki.”
