Shillong, Naiwieng 24
Ka Hynniewtrep Youth Council (HYC) ka la kynnoh ba lada ka Sorkar ka don mon ban pynduhjait ïa u drok ka lah, hynrei ki kam ba ka Sorkar ka leh kim pat biang satia bad kyntu ïa ka Sorkar ba kan pyndonkam ïa ki bor jong ka ha ka ban ïakhun pyrshah ïa u drok.
U Bah Roykupar Synrem haba kren sha ki nongthoh khubor, u la pynpaw ïa ka jingsngewkhia halor ba ka Jylla Meghalaya ha kine ki sngi ka la dei ka jaka ba u drok u la saphriang bha, ym shuh kum ha ki por ba kham mynshuwa ba la ong ba ka Jylla Meghalaya ka dei tang ka lynti ïaid jong u drok.
U la ïathuh ba ka Sorkar Jylla ka lah ban buh ïa ‘Special Court’ hapoh East Khasi Hills District bad ka jingwanrah ïa ka Anti-Narcotics Task Force (ANTF) kaba dei ban peit bniah haba ïadei bad u Drok.
Shuh-shuh u la pynpaw ka jingsngewkhia ïa ka jingpyndonkam ki nongkhaïi drok da ki khynnah rit ban long ki nongrah ban pynsaphriang ïa u drok ha nongbah Shillong, u la ong “Lada ka Sorkar ka don mon ban pynduhjait ïa u drok ka lah, lyngba ka jingpyntreikam ïa ki bor ba ka don, kum ki bor syntiat jong ka, ki bor pulit bad ka ANTF ka kynhun ba kyrpang ban ïakhun pyrshah ïa u drok”
U la ong ba ka Sorkar kam dei ban shu hun noh ba la don ka ANTF ban kem ïa ki briew kiba khaïi drok bad ki ‘Special Court’ ban bishar ïa ki briew ba shah kem hynrei dei ban rat dyngkhong naduh na tynrai ïa u drok, ba um dei shuh ban poi hapoh ka Jylla.
“Ki bor pulit ki don ïa ka bynta ba donkam eh ban pynthikna ïa ka jingpoi u drok ha ka Jylla bad ka Sorkar ka dei ban wad ki lad ki lynti, ngi dei ban sngewrem ba mynta ka Jylla Meghalaya ka la dei ka Jylla ba u drok u la saphriang” la ong u Bah Roykupar Synrem.
