Shillong, Naiwieng 25
U Samla Manbhalang Phankon u ba dei u nongwad jingtip lyngba ka Right To Information (RTI) ka Jylla ha ka 25 tarik Naiwieng 2025 u la leit ban ïakynduh ïa u Chief Executive Member ka Khasi Hills Autonomous District Council u Bah Winston Tony Lyngdoh ban buh da ka jingthoh kum ka jingujor ha kaba ïadei bad ka jinglap jong u lyngba ka RTI ha kaba ki don haduh 12 tylli ki khyrdop khrong khajna hapoh Ri-Bhoi ba la pynïeng da ka Ophis jong u Syiem ka Hima Myllliem.
U ne u samla u la leit ujor sha u CEM ka KHADC bad buh jing-kylli la ki dei kiba la ïoh jingbit na ka District Council ne ki dei ki khyrdop kiba la buh be-aiñ
Haba ïakren bad ki nongthoh khubor hadien ba la mih na kamra u CEM, u samla Manbhalang u la ïathuh ba u la buh jingkylli na u CEM la ka Hima Mylliem ka la ïoh jingbit ne em ban buh khyrdop khrong khajna ha Ri-Bhoi na ka District Council hynrei na ka liang u CEM u la jubab ba um don jingtip halor kine ki khyrdop.
Shuh shuh u la ong ba kane ka jingmih ki khyrdop khrong khajna kam don kano kano ka jingpyn ïohnong ïa ki paidbah ka Jylla hynrei ki kjit kylla na u paidbah ba bun balang.
“Ka jingmih kine ki khyrdop lum khajna kam dei kaba pynïoh nong ïa u paidbah lehse ka la dei kaba pynïoh nong ïano re ïano ne ïa ki riew shimet hynrei ïa kata ngim lah ban tip “u la ong.
U la ban ruh da kaba ong ba ki paidbah ba bun balang ki shah ktah bha na ka jingdon kine ki khyrdop lum khajna ha Ri-Bhoi bad tang kiba la ïaid na ki tei ki khyrdop ki sngewthuh ïa ka jingshah ktah.
Na ka liang u CEM u la kular sha une u samla ba un sa phah ïa ki briew na ka konsil ban leit jurip ïa kitei ki khyrdop khrong khajna ba lada lap ba ki dei kiba be-aiñ na ka liang ka District Council kan sa leh ïa kaba donkam da kaba weng noh ïa kitei ki khyrdop.
