Shillong, Naiwieng 25
U Superintendent of Police ka East Khasi Hills, u Bah Vivek Syiem u la pyntip ba ki pulit ka Shillong, ki la kem ïa uwei u samla jong kawei ka kynthei ba 26 snem ka rta, ka Phidarisha Jyrwa, kaba khlad hadien ka jinghap na ka kali kaba ïaid.
Kane ka jingjia ka la jia ha ka 7 tarik u Naiwieng 2025, ha ka por 11:50 baje mynmiet.
Haba kren sha ki lad pathai khubor u Bah Vivek u ong “Ïa kane ka thei samla la leit shaw da u samla na ka jaka ïathoh ha All Saints bad nangne ki la hiar sha ka surok Police Bazaar hynrei haba poi hajan ka ophis DC, kane ka thei samla ka la hap napoh ka kali kaba ïaid. Ki don ki briew kiba sakhi ïa ka jinghap kane ka samla na ka kali”.
“Kane ka thei samla ka la khlad noh ha ka 13 tarik u Naiwieng ha Woodland Hospital, Shillong. Ngi la ïoh ïa ka Medical Report ïa ka daw ka jingïap ruh kaba dei namar ka jingmynsaw u budlum,” u la bynrap.
U SP u la pyntip ruh ba une u samla, uba ñiah ïa ka kali, la kem noh da ki pulit bad la pyllait pat da kaba bah jamin. Ïa ka kali ruh la kurup noh da ki pulit.
“Ïa mynta ka jingtohkit ka dangïaid shakhmat ban pynthikna la kane ka jingjia ka dei kaba shu jia ryngkhat lane ka dei ka jingñiah kali khlem akor lane ka don kano-kano ka jingthmu ban bret ïa kane ka thei samla na ka kali” ong u Bah Vivek haba bynrap ba ki pulit ki dang bishar ïa ki durkhih CCTV bad ïa ki jingbatai jong u (statement) namar ki don shibun kiei-kiei kiba hap ban tip.
U hynmen jong kane ka thei samla u la ujor da ka ejahar ha ka 10 tarik u Naiwieng 2025.
