Shillong, Naiwieng 25
Ka Sorkar Jylla ka la kyntu ïa ka Sorkar Pdeng ban pynkylla ïa ki kyndon jong ka National Council for Teacher Education (NCTE) hadien ba la don ka jingpyrshah ïa ka rai jong ka Supreme Court kaba la pynlong kongsan ïa ka Teacher Eligibility Test (TET) na bynta baroh ki nonghikai kiba dang trei, khlem da kheiñ ïa ka jingslem jong ka jingshakri jong ki.
“Ngi la dep bthah ïa u Advocate General ban mudui da ka ‘Review Petition’ (pyrshah ïa ka rai jong ka SC) bad kaba kham kongsan ka long ba ngi pyrshang ban pynngeit ïa ka Sorkar Pdeng ban wanrah jingkylla ha ki kyndon jong ka NCTE khnang ba kan ym don jingktah ïa kaba shadien hynrei ka dei ban treikam tang hadien ka jingwan jong ka RTE,” ong u Myntri ka tnad pule-puthi, u Bah Lahkmen Rymbui haba kren sha ki lad pathai khubor ha ka Sngi Ba-ar.
Halor ka jingleit ïashim bynta jong ki nonghikai na ka Jylla sha ki jingïakhih ha Delhi, u Bah Rymbui u la ong ba um don jingtip shaphang kane bad ba ka jingïashim bynta ha kum kine ki jingïakhih ka dei kaba la rai da ki seng nonghikai bapher-bapher .
U la pynkynmaw biang ïa ki jingpyrshang jong ka Sorkar ban ïada ïa ka jingshakri jong ki nonghikai da kaba ong, “Ka Sorkar Jylla ka pyrshang ban leh katba lah ban peit ba kano-kano ka hukum ba la ai da kano-kano ka bor ba dei khmih kaba ktah ïa ki jingshakri jong ki nonghikai, kam dei ban treikam da kaba phai dien ïa ki snem ba la leit, hynrei shakhmat.”
“Hadien ba la ong kumta, kumba long mynta, ka rai jong ka Supreme Court kaba bthah ba ka TET ka dei ka bynta kaba kongsan, kata ka ïeng,” ong u Bah Rymbui haba pynbna ba ka Sorkar kan kohnguh ïa ka rai jong ka ïingbishar.
Haba kylli shaphang ka ‘Review Petition’, u Bah Rymbui u la ong, “Ngi la dep rai bad u AG u dang trei halor kane. Ki kot ki sla kiba donkam ki dang don hapdeng ka jingpynkhreh.”
“U AG u la dei ban dep ban ujor ïa kane hynrei ngam pat shym la kylli na u, hynrei la shim ïa ka rai bad la ai ka jingbthah (ban ujor ïa ka ‘Review Petition’ pyrshah ïa ka rai jong ka SC),” u la pynpaw.
