Shillong, Naiwieng 25
U Myntri ba khmih ïa ka tnad aiñ, u Bah Lahkmen Rymbui u la ban jur ba ka jingtyrwa jong ka Sorkar ban ïoh ïa ka Inner Line Permit (ILP) ka pynpaw ïa ki jingduna ha ka ban tehlakam ïa ka jingwan tuid khlem sangeh bad ka jingwan buhai shnong beaiñ ki briew sha kane ka Jylla.
Haba kren sha ki lad pathai khubor u Bah Rymbui u ong “Lada ki aiñ kiba mynta ki biang, ngin ym pan ILP. Ngi la ïohi ba ki don katto-katne ki jingduna (ha ki aiñ kiba la don lypa), dei na kata ka daw ba ngi pan pyntreikam ïa ka ILP”.
Da kaba shim ïa ka jingïanujor ha ka pyrthei, u Bah Rymbui u la kdew ba wat ka US, kaba don ha duriaw bah, ka ïaleh bad ka dang sakhi ïa kiba bun ki nongwan buhai shnong be-aiñ kiba wan shong shnong ha katei ka ri.
U la ong ba ka Jylla Meghalaya ka pyrshang katba lah ban peit ban ym don ki briew kiba wan buhai shnong beaiñ kiba lah ban shong ban sah ha kane ka Jylla Meghalaya.
“Dei na kata ka daw ba ngi don bun ki kyndon ban khanglad (jingshong shnong beaiñ). Ngi don ïa ki ADC, ngi don ïa ka Land Transfer Act, ngi don ïa ka Meghalaya Resident Safety and Security Act (MRSSA), hynrei tang kawei kaba donkam ka long ka jingïatreilang ha ka imlang sahlang bad ki paidbah ka Jylla,” u la ong.
U la pynpaw ruh ba baroh ki aiñ kim long kiba janai bad ki paidbah ka Jylla ki dei ban peit ba ki nongwan buhai shnong be-aiñ kim lah ban shong ban sah ha ka Jylla Meghalaya.
“Haba ngi ïohi ba ka Sorkar India kam ong ei-ei halor ka ILP, ngi la mynjur ruh ïa ka jingpynkylla ïa ka MRSSA hynrei kaba sngewsih ka long ba la phah sha President bad ngam lah ban kren eiei halor kata,” la ong u Bah Rymbui.
“Namar kata, nga ong ba ngi hap ban pyndonkam ïa baroh ki kyndon bad ki jingbthah kiba don, ngi hap ban pyntreikam hok, khnang ba ngin lah ban khanglad katba lah ïa ka jingwan rungtuh la ka long na kiwei pat ki bynta jong ka ri ne shabar ri ruh kumjuh,” u la bynrap shuh-shuh.
