Shillong, Naiwieng 25
Ka Education Cell ka Hynniewtrep Youth Cou ncil (HYC) ha ka sngi Ba-ar ka la leit ban phah tuklar ïa u Commis-sioner & Secretary ka tnad pule puthi, u Vijay Kumar Mantri, IAS halor ka jingkynduh jingeh ki samla thep kam ïa ki kam ‘lecturer’ ba lait hapoh ka Shillong Government College of Engineering.
“Ka Meghalaya Education Recruitment Board ha ka 23 tarik Risaw ka la ai jingpynbna (Advertisement) ba ki don 3 tylli ki kam ‘lecturer’ ba lait hapoh ka Shillong Government College of Engineering kiba kynthup ïa ka kam Lecturer in Electronical Engineering, Asst Professor in Civil Engineering bad Asst Professor Electrical in Engineering” la ong u Bah Enlang Sawian.
Haba kren sha ki nongthoh khubor u Bah Enlang u la ïathuh ba kiba bun ki samla thep kam kiba la pyndep ïa ka ‘Combine Course’ kim ïohlad satia ban aplai ïa katei ka kam ba lait, namar ba ym pdiang ïa ki kot ki sla jong ki.
U Bah Enlang u la ong ba halor kane ka seng ka la pan jingshai na u Commissioner ha kaba ka tnad ka pynpaw ba ka khlem tip ba ka don ka ‘Combine Course’ kaba ki la don ruh ki samla pule kiba la pyndep ïa kane. Ka seng halor kane ka la phah tuklar ba dei ban ailad ïa ki samla ba la dep ïa kane ka ‘Course’.
U Bah Enlang u la pyntip ba halor kane na ka liang u Vijay Kumar Mantri u la kular ba un shimkhia bad la pynjlan ïa ka tarik ba khatduh ba ki samla thep kam ki lah ban thep ïa kane ka kam haduh ka 11 tarik u Nohprah 2025. U la kyntu ruh ïa ki samla ba la pyndep ïa ka ‘Combine Course’ ba kin thep ïa kane ka kam.
Haba bynrap u samla Wallman Kharlyngiong u la pyntip ba ka seng ka la pan jingshai ruh haba ïadei bad ka baibam ki khynnah pule (Scholarship), ha kaba la ïoh jingtip ba ka Sorkar kan sa pyllait ïa ka bynta ba sah ha shuwa jong ka Khrismas.
