Shillong, Naiwieng 26
Ka Kynhun Myntri ka Jylla ka la mynjur ban seng ïa ka ‘Meghalaya Teacher Training Academy’ (MTTA) kum ka kynhun kaba laitluid ne ka ‘Autonomous Society’ ban kyntiew ïa ka jingai jinghikai sha ki nonghikai, ka jingpyntbit khnang ban treikam kham bha, bad ka jingroi ha ka liang ka kam ka jam.
Haba kren sha ki lad pathai khubor hadien ka jingpynïaid ïa ka jingïalang ka Kynhun Myntri ha ka Sngi Balang, u Myntri Rangbah ka Jylla, u Conrad K. Sangma u la ong ba katei ka ‘Society’ kaba la tyrwa, ban thaw hapoh jong ka Directorate of Education Research and Training (DERT), kan pynleit jingmut ha ka ban ai ïa ka jinghikai kaba kyrpang sha ki nonghikai ha ki kyrdan bapher-bapher.
Katkum ka jingong jong u, ka ‘Society’ kan pyntikna ruh ïa ka jingkhmih bniah jong ki ‘riew shemphang haba ïadei bad ka rukom ai jinghikai – ka ban ailad ïa ka jingpyntbit ha ka jinglah ban treikam bha bad kaba don ïa ka thong.
Kumba ka long mynta, bun ki tnad treikam Sorkar bad ki kynhun bei pisa ki pynlong ïa ki prokram ai jinghikai sha ki nonghikai, bunsien kiba ïapher pat haba phai sha ka jingjop jong ki.
La khmih lynti ba kane ka ‘Academy’ ka bathymmai kan pynbeit ryntih ïa kine ki jingpyrshang, da kaba ai ïa ka rynsan kaba long pdeng na ka bynta ka jingai jinghikai kaba paka bad ban pyntikna ba ïa ka pisa la pyndonkam hok ha ka rukom ba dei.
“Ki don ki tnad bei tyngka bapher-bapher kiba don pisa na ka bynta ban ai jinghikai ïa ki nonghikai bad ki pynïaid ïa ki jinghikai baroh ha la ka jong ka jong ka bor bad ha la ka jong ka jong ka kyrdan kaba teng-teng kam ju ai ïa ka jingmih ne ka risol kaba ngi kwah bad kumta kawei ka ‘Society’ kan pyntikna ba ka don ka jingpynleit jingmut ha man la ka tnad treikam ne man la ka prokram kaba don hangta, la ka long ka jingbei tyngka ban ai jinghikai ïa ki nonghikai, ïa ka pisa yn phah sha kane ka ‘Society’ bad yn ai jinghikai ha ka kyrdan kaba tbit da kane ka ‘Society’ ba kyrpang,” la ong u Conrad.
