Nongstoiñ, Naiwieng 26
Ka shnong New Nongstoiñ lyngba ka Seng Longkmie ha ka jingdonlang ki VDP jong ka shnong, ha ka step jong ka sngi Balang ka taïew ki la ïoh ban theh biang ïa ka kyiad da ki spah bilor.
U Bah G. Marbaniang Secretary ka shnong New Nongstoiñ u la ong ba ïa kane ka kyiad la ïoh kem biang ha kine ki sngi ba la dep kumba ar kali.
U la ong ba ka la long ka jingduh kaba khraw na ka bynta ki nongdie kyiad, bad ka shnong ka la maham bad bthah ba kim dei ban die kyiad hapoh shnong hynrei kim ngeit bad hadien ba la kem la sneng la kraw ïa ki, ha kaba uwei na ki samla u la panmap bad u ong ba u dang sdang ïa kane ka kam dang shi bnai hynrei la ïoh kem noh bad u la pynpaw ba un nym mlien shuh.
Kumta kane ka long ka jingmaham na ka liang jong ka shnong ïa ki trai ‘wine store’, ïa ki nongkhaïi ba lada ki die hangno-hangno ka jaka kaba yn pynpoi ïa ka kyiad ka biang hynrei hapoh shnong New Nongstoiñ kan nym shah ban pynlong ‘wine store’ ha surok, ong u Bah G. Marbaniang.
U la ïathuh ruh ba kum ka shnong ha ryngkat ki Seng Longkmie, VDP kin nym shong thait bad ha kaba mynta ka la dei ka sien kaba ar ba la ïoh ban kem bad la pynjot noh da kaba theh ïa baroh ka kyiad ba la ïoh kurup ha ka jingdonlang ki dkhot ka Seng Longkmie, u President ka VDP ban ïa sakhi lang bad la ïa kut ruh ba nangne shakhmat kin nang ïatreilang.
“Nga kyntu ïa ki nongdie kyiad ba kin sngewbha ban leit bylla noh da kiwei-kiwei ki kam namar yn myntoi aiu haba phi leit thied ha ka dor ba rem ba rem ynda poi bad ngi, ngi theh noh ïa ki bad ka long ka jinglehnohei. Phi khmih lynti ban long ka jingmyntoi hynrei kan long ka jingduh jingmyntoi kaba khraw,” ong u Bah Marbaniang.
