Khliehriat, Nohprah 01
Ka dei ka Dorbar Shnong Daistong ym u Waheh Shnong Daistong uba ai No Objection Certificate (NOC) ban seng ïa ka karkhana Shree Cement Limited ha ka Shnong Daistong, ong u Waheh Shnong ka Daistong u Ma Himon Pajuh.
Katei ka karkhana bathymmai ‘Shree Cement Limited’ ka thmu ban seng ïa ka karkhana ha ka jaka kaba la tip kum ka Khara Siang Lum Pyrshin kaba don ha Daistong kaba hap hapoh ka Elaka Nongkhlieh, East Jaiñtia Hills District.
U Waheh Shnong jong ka Daistong Ma Himon Pajuh u la ai katei ka jingpynshai hadien ka jingkynnoh jong ki shi kynhun ki nongshong shnong jong ka Daistong ba ïa ka NOC sha katei ka karkhana la ai da u Waheh Shnong khlem ka jingtip jong ka Dorbar Shnong.
Haba kren sha ki lad pathai khubor ha ka 1 tarik Nohprah, u Waheh Shnong Ma Himon Pajuh, u la pynshai ba ka jingai NOC sha ka kompeni thymmai ka Shree Cement Limited kam dei ka jingai shimet ka jong u, ka dei da ka jingtip bad ka jingrai lang jong ka Dorbar Shnong Daistong.
“Ka jingkynnoh jong ki shikynhun ki nongshong shnong pyrshah ïa nga ka dei kaba bakla”, la ong u Waheh Shnong.
U la pynshai ba hashwa ban ai ïa ka NOC, la pynlong haduh 6 tylli ki dorbar kata 4 tylli hapoh u bnai Nailar bad 2 tylli ha u bnai Nailur khnang ban sngap ïa ka sur bad ka rai jong u paidbah nongshong shnong.
U Waheh Shnong u la pyntip ba hashwa ban ai NOC, ka dorbar shnong Daistong kala dep ban ïa kut 7-8 tylli ki soskular ne agreement bad katei ka kompeni kata ban pynïoh kam ïoh jam ïa ki nongshong shnong, ban ai dewbilat shiteng dor, pynbha ïa ki surok shnong ki lynti synkieng, ki umbam umdih, pynïoh jingïarap lada jia pluh ïing, pynïoh jingïarap haba long ki jingïaseng heh jingïaseng rit bad pynïoh Ambulance ïa ka shnong nalor kiwei-kiwei.
Hynrei u la pyntip ba ïa baroh kine ki jingïakut ym pat ïohlad satia ban pynsngew hapoh ka Dorbar Shnong namar ba ki khun jong ka shnong ki dang bunkam bad ïa beh ban pyndep ïa ka jingot kba ot khaw.
Haba ïadei bad ka jingpyrshah ban shna ïa ka karkhana ha Khara Siang Lum Pyrshin, na ka liang u waheh shnong u la ong ba ïa kata um tip eiei, bad bynrap ba ka Dorbar shnong Daistong ka shim katkum ka jingpynbeit jong ka Elaka. U la ïathuh ba ha ka dorbar kaba nyngkong jong ka Ekala la mynjur ha Lum Rynksan, bad hadien pat ka Elaka kala rai ban shah ïa ka kompeni ban seng karkhana kat shaba ka ïoh jaka hynrei kan shong pat ha ka jingpdiang jong ki nongshong shnong.
U la pyntip ruh ba ki nongshong shnong ka Daistong kiba pdiang ïa ka jingwan jong katei ka karkhana ki long 85%. U Assistant Waheh Shnong Ma Hoimatlang Phyrngap ryngkat ki dkhot shnong kynthup Ma Pheing Sutnga, Ma Longsing Lamare nalor kiwei kila ong ba ka jingkynnoh jong ki nongpyrshah ka dei tang ka jingpynjah burom ïa ki nongïalam shnong.
