Shillong, Nohprah 01
Ar ngut ki briew ki la khlad noh hashen katba ar ngut kiwei pat ki la mynsaw hadien ba ka la don ka jingjia ïatynrah hapdeng ki trok 16 shaka, kaba la jia ha ka surok Shillong By-Pass.
Katkum ka tyllong khubor la ong ba ha ka nohphai sngi jong ka 29 tarik u Naiwieng, 2025, ha ka por kumba 3.40 eiei, ki bor pulit ka tnat Traffic ki la ïoh jingtip ba ka la don ka jingjia ïa tynrah hapdeng ar tylli ki trok ha Dewsaw ha surok Shillong By-Pass.
Katkum ka jingpyntip na ki pulit ka tnad Traffic ha ka nohphai sngi 01 tarik u Nohprah, 2025, la ong ba ka trok kaba don ïa u registration number AS01-TC-4615 (16-shaka) kaba kit clinker bad dang wan na Lumshnong ban leit sha Guwahati ka la tynrah ïa kawei pat ka trok kaba don ïa u registration number NL01-AG-2304 (16 shaka) kaba kit ‘flyash’ bad dang wan na Guwahati ban leit sha Jowai.
La ong ba ka trok ba kit clinker ka la kylla ha katei ka jaka bad ha ka jingwad bniah la shem ba don lai ngut ki briew kiba la sahkut ha katei ka trok kaba kylla.
U nongñiah ka trok ba kit ‘flyash’, u Bah Iapyrkhat Kharsati uba la mynsaw malu mala la pynkit noh sha ka CHC ha Mawryngkneng da ki bahaïing bad hadien ka jingsumar la pyllait noh ïa u.
U nongbud ka trok kaba la kylla, u Bah Pyntngen Tariang la lah ban sei bad rah sha CHC Mawryngkneng, ban ïoh jingsumar.
Kiwei pat ar ngut kiba sahkut hapoh katei ka trok kaba la kylla la sei da kaba pyndonkam da ka Hydra Crane bad ka puh shilum bad hadien la shem ba baroh ar ngut ki la khlad ha shen.
Na ka jingwad jingtip la shem ba kiba ïap ki kynthup ïa u Bah Esalam Challam, uba dei u nongñiah bad u Bah Sambha Tlang, uba dei uba leit jingleit lang da ka trok bad kine ar ngut ki dei na ka shnong Moorap ha West Jaiñtia Hills District.
Shuh shuh ki bor pulit ki ïathuh ba la rejistar mukotduma ïa kane ka jingjia ha thanad Mawryngkneng bad ka jingtohkit ka la ïaid shakhmat.
