Shillong, Nohprah 01
Ka Meghalaya AIDS Control Society Health and Family Welfare ha ka sngi Nyngkong jong ka taïew, ka la rakhe ïa ka World AIDS Day, ba la pynlong ha State Convention Centre.
Ha kane ka sngi la wan ban ïa don bynta lang da ki MLA, ba kynthup ïa u Bah Adelbert Nongrum, Bah Olan Sing Suin, u Bah Mathew B Kurbah, u Principal Secretary, Sampath Kumar, ki doktor, ki samla bad kiwei-kiwei de.
Haba kren ha kane ka sngi, u Myntri ka tnad Health and Family Welfare, u Bah Wailadmiki Shylla u la pynkynmaw haba u shimti kum u Myntri jong ka tnad ha kaba ki nongïalam jong ka MACS ki wan ban ïa kynduh ïa u ha ryngkat ka jingpyntip ïa ki kam kiba ki trei.
U la bynrap da kaba ong ba watla kum ka kynhun ka la trei shitom ban pynsngewthuh halor kane ka jingpang bad khmih lynti ba ki paidbah kin wan ban leh test, hynrei ka jingdon ki nongpang ka dang bun shuh-shuh.
“Ban don ïa ka jingpang HIV kam dei tang ba phi don ïa kane ka jingpang, hynrei ka jingshah kren na lai phew jait ha ki paidbah,” la ong u Myntri.
U la ong “Ka jingdon kiba wan phah test ka duna, da kaba buh jingkylli ruh, balei kine ki briew kiba wan dih dawai hadien pat ki sangeh noh?, ka dei kaei-kaei kaba kin hap ban ïa kren. Ngi dei ban wad ïa ka jingeh kaba ki ïa kynduh bad ban tip ïa ka daw”.
U Myntri u la kyntu ruh ïa ki paidbah ka Jylla ban ïatrei lang, namar kane kam lah ban urlong lada ap tang ïa ka MACS ba kan trei, hynrei ka dei ka kamram ki paidbah ban ïatreilang.
Shuh shuh u la pynbna ba ka Sorkar kan sdang ïa ka ‘mission’ ba 5 snem ha kaba kin buh bun ki jaka ban leh test ha kylleng ka Jylla. “Ka Sorkar Jylla kan mang pisa kumba T.25 klur tam, na ka bynta ki jaka sumar bad ki jaka ban test ïa ki paidbah” u la ong.
Ha kane ka sngi, u Myntri u la kaweh ruh ïa ka lama na ka bynta ka Bike Rally bad thang mombati.
