Shillong, Nohprah 01
U President ka Congress, Bah Vincent H. Pala, u la kyntait halor ka jingïashrut kaba ïai bteng hapdeng u Saleng A. Sangma bad u Dr. Mukul M. Sangma, da kaba ong ba ka dei ka kam hapdeng kitei ki arngut ki nongïalam.
“Ka saiñ pyrthei ka kylla na ka por sha ka por, ym don paralok ba neh, ym don nongshun ba neh,” la ong u Bah Pala haba kren sha ki nongthoh khubor ha ka Lah Sngi U Blei, da kaba ban jur ba ka Congress ka plie bad pdiang sngewbha ïa baroh, kynthup ïa u Dr. Mukul Sangma, lada u rai ban wanphai biang.
U Bah Pala u la kubur ïa ka jinglong rangbah bad jingshemphang jong u Dr. Sangma ha ka saiñ pyrthei, hynrei u la kdew ba u Myntri Rangbah barim ka Jylla u la pynpaw bunsien ba um pynïasoh shuh sha ka Congress.
“Nga tharai ba u tip bha ïa la ka nongrim,” la ong u Bah Pala bad bynrap ba ka rai jong u Dr. Sangma ka long kaba shai.
Kane ka jingkren jong u President ka MPCC ka long hadien ka jingïakren shane-shatai halor ka lawei jong u Dr. Mukul Sangma, ha kaba ki khubor ki pynpaw ba u dang wad ki lad ki lynti, kynthup ban pynïasoh biang sha ka Congress ne ban thaw ïa ka seng ‘riewlum kaba thymmai.
Shuh shuh u Bah Pala u la ban jur ba kano-kano ka rai halor ka jingwanphai biang jong u Dr. Mukul Sangma kan donkam ïa ka jingmynjur na ka All-India Congress Committee (AICC).
