Shillong, Nohprah 01
U Myntri Rangbah ka Jylla, u Conrad K. Sangma ha ka Lah Sngi U Blei u la leit ban ïashim bynta ha ka sngi kut jong ka jingïalang ka kylla ba 4 – ‘Organic Youth Summit’ ha Court-yard Marriot, Shillong.
Ha kane kajuh ka jingïalang bah, la pynlong ruh ïa ka ‘Northeast India Organic Week-cum-Buyer Seller Meet’ ha ka sien kaba nyngkong eh.
Haba kren ha kane ka jingïalang, u Myntri Rangbah ka Jylla, u Conrad K. Sangma u la ong ba ki prokram, ki mat treikam bad ki ‘agenda’ jong ka Sorkar ki long kiba la pynleit jingmut ban ïarap bad kyntiew ïa ki nongrep ka Jylla bad ba kane ka jingïalang ryngkat ka jingthmu ban ïoh jinghikai, ban ïasam bad ban ïarap ïa ki nongrep kan ïai bteng wat hadien kane ka jingïalang kaba lai sngi.
“Ki nongrep ki long ka bynta ba kongsan jong ki mat treikam jong ngi bad ki prokram ‘Mission Mode’ bapher-bapher jong ngi ha ka rep ka riang bad ki bynta ba ïasohlang ki long ban ai mynsiem ïa ki nongrep bad ban ai sha ki ïa ka jingkyrshan bad jingïarap kaba donkam,” u la ong.
Halor ka ‘Organic Mission’ jong ka Jylla, u la ong ba ka ‘Organic’ kam dei tang ka kyntien kaba la paw na ka bynta ka Jylla hynrei ka leit ne phai biang sha ka jingtip, riti-dustur bad ki rukom treikam jong ki kpa tymmen kiba la rep da ki spah snem bad kiba rakhe ïa kata ka rukom bad ka rep ka riang.
U la pyntip ruh ha ka jingïalang ba ka rep ka riang, ka kam jngohkai pyrthei bad ka kam shakri ki dei ki bynta ba kongsan na ka bynta ka Sorkar bad bynrap, “Ngi kwah eh ban ïohi ba ka jingïasoh lang kaba khlaiñ kan urlong hapdeng ka kam jngohkai pyrthei bad ka rep ka riang khamtam eh ka rep ka riang kaba khlem ai dawai – kumta shibun ki kam kiba dang ïaid ha ka liang ki kam jngohkai pyrthei la pynïasoh bad ka ‘Organic Mission’ ryngkat bad ki prokram seng kam seng jam.”
Haba pynpaw ïa ka jingkmen ba kane ka jingïalang ka la long ha Shillong, u la pynkut da kaba ong, “Ngi la long kiba skhem bha shaphang ka rep ka riang kaba khlem ai dawai bad nga kyrmen ba kane ka jingïalang ka la long ka lad ban ïasam ïa ka jingtip bad ki rukom treikam jong ki kpa tymmen jong ngi sha ka pyrthei baroh kawei bad ai ba kane kan long ka jingsdang ban tei ïa ki jingïadei, ka jingïasam ïa ka jingshemphang bad ka jingpynïasoh.”
Shuh shuh u Myntri Rangbah, hadien kane, u la ïakren bad ki nongïashim bynta na kiwei pat ki ri kiba la kylli jingkylli halor ka thong jong ka Jylla, ka jingpyndonkam ïa ka teknoloji, ka jingkyrshan ha ka liang ki marbam bad kiwei-kiwei na ka bynta ki samla nongseng kam seng jam.
Ha kane ka sngi la pynurlong bad pyllait paidbah ruh ïa ka ‘Organic Meghalaya Compendium’ bad ïa ka ‘website’ – ‘Megnolia’.
