Shillong, Nohprah 01
U President ka Meghalaya Pradesh Congress Committee u Bah Vincent H Pala u la kynnoh ïa ka Sorkar Jylla ba la ïalam da ka National People’s Party (NPP) ba ka jingshimram kaba la kot haduh 37% na ka Gross State Domestic Product (GSDP) ka dei kaba heh tam ha ka ri bad ong ba ka jingshim ram palat jong ka Sorkar ka buh ïa ka Jylla Meghalaya sha ka jingdap ram.
Haba kren sha ki nongthoh khubor ha ka sngi Nyngkong u Bah Pala u la kdew ba ka jinglum khajna hapoh ka Jylla ka long tang T. 4000 klur, katba ka jingïoh na ka Sorkar Kmie pat ka long kumba T. 9000 klur, kaba pynbor ïa ka Sorkar ban shaniah shibun ha ki ram.
U Bah Pala u la kynnoh ba ka Sorkar ka la klet ïa ki bynta ba kongsan kum ban kyntiew ïa ka pule puthi, katba ka la pyndonkam bakla ïa ka ram na ka bynta ka jingmyntoi shimet. “Ka jingpheil ba khraw jong ka Sorkar ka long ba ïa ka pisa ba ka shimram ki pyndonkam ban shna surok bad ïa ki kam ruh la ïoh tang da ki briew jong ki hi, katba ki paidbah ki nangduk nangduk bad ki mad ruh ïa ka kyrduh kam kyrduh jam”u la ong.
U Bah Pala u la ong ba kane ka jingleh jong ka Sorkar ka lah ban ïalam sha ka jingsah ram, da kaba kdew ruh ïa ki jingmaham na u Auditor General bad ka NITI Aayog, ba ka Jylla Meghalaya ka la jan poi sha ka jingsah ram, hynrei ïa kane kim ju ïathuh sha ki paidbah halor ka jingsah ram.
U la kyntu ïa ki paidbah ka Jylla Meghalaya ba kin kynmaw ba ka Sorkar ka pyndonkam bakla ïa ka pisa, da kaba ong uwei pa uwei u nongshong shnong u kit ram kumba T. 76,000.
Shuh-shuh u Bah Pala u la kynnoh ba ka Sorkar jong ka NPP ka la pheil ha ka rukom ban pynmih khajna bad kiwei-kiwei ki lad, kaba pynbor ïa ka ban shim ram bun.
U la ong ruh ba ka jingshim ram ka Sorkar ka ap jingma ïa ka lawei jong ka Jylla namar naei kan siew pat ïa ka ram hadien habud.
